ដើរចេញពី Juventus មកស្វែងរកអនាគតថ្មី នៅក្លឹបក្នុងទីក្រុងរ៉ូម ដូចរាប់ពីចំណុច ០ ឡើងវិញ តែលទ្ធផលបែរផ្ទុយស្រឡះនៅចំណុចចាប់ផ្តើមថ្មីថ្មោង ការលេងឲ្យក្លឹប AS Roma សឹងតែថា ល្អជាង ទាំងកាលនៅក្លឹបសេះបង្កង់ទៅទៀត ហើយជាមួយឱកាសឆ្ពោះមកប្រជែងពានអឺរ៉ុប ក៏ឃើញផ្លែផ្កាកៀកនឹងបានឈ្នះផងដែរ។
លេងបានទាំងតំណែងបម្រើ ម្តងម្កាលក៏អាចបត់ប្រើ ទៅជួយតំណែងប្រយុទ្ធ នៅរដូវកាល ២០២២/២៣ កីឡាករអាហ្សង់ទីន បានចូលរួមជួយក្លឹបដឹកនាំដោយអ្នកចាត់ការលោក Jose Mourinho ចំនួន ៣៧ ប្រកួត ក៏រកបាន ១៧ គ្រាប់និង Assist ៨ លើក នៅការឈរជើងជាង ២ ៤០០ នាទីលើទីលាន។
ក៏ប៉ុន្តែសោកស្តាយ កីឡាករអាយុ ២៩ ឆ្នាំ កៀកចូលក្បាល ៣០ នៅខែវិច្ឆិកាខាងមុខ បែរត្រូវរបូតឱកាសឈ្នះពានអឺរ៉ុបជាលើកដំបូងក្នុងអាជីព ជាលើកទី ២ ជាមួយបរាជ័យក្រោមថ្វីជើងក្លឹបអេស្ប៉ាញ Sevilla នៅវគ្គផ្តាច់ព្រ័ត្រ Europa League។
ហេតុផលដែលនាំឲ្យ Dybala សោកសៅ ដល់ស្រក់ទឹកភ្នែក មើលទៅគួរឲ្យអាណិតជាងកីឡាករឯទៀត ត្រង់ថាបុរសម្នាក់នេះបានហែលកាត់រឿងរ៉ាវមិនល្អ ពីមុនច្រើនណាស់ ដូចគ្នានៅចុងរដូវកាល តាមស្ថានភាពប៊ិះតែត្រូវបានរបួសញាំញី រាំងស្ទះដំណើររបស់គេដល់បញ្ចប់រដូវកាល ដល់ជាក់ស្តែង មានឯណា បែរទាំងអាចស្តារមុខមាត់ឡើងវិញ ជាអ្នករកបានគ្រាប់បាល់ជូនក្លឹបទៀតផង។
មុនការប្រកួត សូម្បីអ្នកចាត់ការ Jose Mourinho ក៏មិនប្រាកដប្រជានឹងស្ថានភាព Dybala ដែរ រួចលើកឡើងថា កីឡាករអាហ្សង់ទីនទំនងអាចចូលលេងតែ ២០ ទៅ ៣០ នាទីលើទីលានប៉ុណ្ណោះ។ ដល់បញ្ជីឈ្មោះកីឡាករនៅជម្រើស ១១ នាក់ដំបូង សម្រាប់ប្រកួតក្នុងកីឡដ្ឋាន Puskas Arena នៃទឹកដីហុងគ្រី ភ្ញាក់ផ្អើលបែរមានឈ្មោះ Dybala នៅជម្រើសដំបូង ក៏អាចរកបានគ្រាប់បាល់នៅនាទី ៣៤ មុនត្រូវបានប្តូរចេញនៅនាទី ៦៨ នៃតង់ទីពីរ។
មួយគ្រាប់សារនេះដែរ ក៏នាំឲ្យ Dybala ឆ្លាក់កំណត់ត្រា ក្លាយជាកីឡាករអាហ្សង់ទីន អាចរកបានគ្រាប់បាល់វគ្គផ្តាច់ព្រ័ត្រ ខកខានកើតមានតាំងជំនាន់ Lionel Messi ធ្វើបានឲ្យ Barcelona ទល់ Man Utd យកឈ្នះ តំណែងជើងឯក UCL កាលឆ្នាំ ២០១១។ ខុសពីកីឡាករជំនាញជើងឆ្វេងខាងលើ បែរត្រឹមបានតំណែងជើងឯករង បន្ទាប់ក្រុមចាញ់ដោយលទ្ធផលបាល់កាត់សេចក្តីប៉េណាល់ទី ១-៤។
បើរំឭកដល់រឿងចាស់ ក៏ល្មមនឹងធ្វើឲ្យអតីតសមាជិកសេះបង្កង់ ស្រក់ទឹកភ្នែកមិនខុសទេ ព្រោះអីកាលឆ្នាំ ២០១៧ វគ្គផ្តាច់ព្រ័ត្រ Champions League ទល់ Real Madrid ជាឱកាសជិតបានស្គាល់ជាតិកាន់ពានអឺរ៉ុបលើកដំបូងទៅហើយ បែរជាចាញ់ ១-៤ ដូចគ្នា។ ដល់តែសារនេះ បែរមកជួបរឿងដដែល កែរកជ័យជម្នះមិនឃើញទាល់តែសោះ។
នេះ Dybala នៅសេសសល់ភារកិច្ចមួយចុងក្រោយ មុនបិទរដូវកាល គឺការប្រជែងយកកៅអី Europa League ដើម្បីជាឱកាសថ្មីនៅរដូវកាលបន្ទាប់ ដ្បិតគិតត្រឹមជុំទី ៣៧ ឈរលេខ ៦ មិនទាន់ធានាកៅអី ហើយត្រូវប៉ះ Spezia នៅទាបភ្លឺថ្ងៃទី ០៥ មិថុនាខាងមុខ ក្នុងការសម្រេច ២ ក្លឹបរវាងពួកគេ, Atalanta និង Juventus៕អានពត៌មានប្រចាំថ្ងៃ