ឯកសារលេចធ្លាយបង្ហាញថា មហាសេដ្ឋីរុស្ស៊ីបានប្រើប្រាស់ក្រុមហ៊ុនផ្សេងមួយ ដើម្បីធ្វើប្រតិបត្តិការផ្ទេរប្រាក់ដែលមានតម្លៃរាប់សិបលានផោន ដល់ភ្នាក់ងារ និងសហការី ដែលហាក់ដូចជាដើម្បីផលប្រយោជន៍របស់ក្លឹប Chelsea ហើយអាចបំពានច្បាប់ហិរញ្ញវត្ថុ ប្រសិនបើពួកគេមិនត្រូវបានប្រកាសជាផ្លូវការ។អានពត៌មានប្រចាំថ្ងៃ
Chelsea ត្រូវបានពិន័យជាប្រាក់ ៨.៦ លានផោនដោយ UEFA កាលពីខែកក្កដា ជាផ្នែកនៃការទូទាត់សម្រាប់ការបំពានច្បាប់ Financial Fair Play ដែលជាលទ្ធផលនៃ “ការបញ្ជូនព័ត៌មានហិរញ្ញវត្ថុមិនពេញលេញ” រវាងឆ្នាំ ២០១២ និង ២០១៩។ ការបំពានទាំងនោះត្រូវបានរាយការណ៍ដោយម្ចាស់ក្លិបថ្មីនៅ Stamford Bridge បន្ទាប់ពីការលក់ភាគហ៊ុនក្លឹបទៅឱ្យក្រុមហ៊ុន ដែលដឹកនាំដោយវិនិយោគិនអាមេរិក Todd Boehly និងក្រុមហ៊ុនភាគហ៊ុនឯកជន Clearlake Capital។
ទាំងសមាគមបាល់ទាត់អង់គ្លេស FA និង Premier League កំពុងស៊ើបអង្កេតការបំពានច្បាប់ហិរញ្ញវត្ថុ ដែលអាចកើតមានដោយក្លឹប។
គូសរំលឹកថាលោក Roman Abramovich បានទិញក្លិបបាល់ទាត់ Chelsea ក្នុងឆ្នាំ ២០០៣ និងបានបណ្តាក់ទុនរាប់លានក្នុងរយៈពេលជិត ២ ទសវត្សរ៍ ខណៈដែលក្លឹបបានបន្តឈ្នះ Champions League ក្នុងឆ្នាំ ២០១២ និង ២០២១ ក៏ដូចជា Premier League ចំនួន ៥ ។ Roman Abramovich ត្រូវបានបង្ខំឱ្យលក់ក្លឹបកាលពីឆ្នាំមុន ក្រោយទ្រព្យសម្បត្តិរបស់គាត់ត្រូវបានបង្កកដោយរដ្ឋាភិបាល បន្ទាប់ពីការលុកលុយរបស់រុស្ស៊ីលើអ៊ុយក្រែន៕