Al-Nassr ចង់នាំយក Zaha មកចា.ប់ដៃប្រយុ.ទ្ធជាមួយ Ronaldo ធ្វើព្យុះភ្លៀងនៅអាស៊ី

Wilfried Zaha បានទទួលការផ្តល់ជូនដ៏ធំសម្បើមដើម្បីចូលរួមជាមួយ Cristiano Ronaldo នៅក្លឹបអារ៉ាប៊ីសាអូឌីត Al Nassr ។ បើយោងតាមសារព័ត៌មាន Sky Sports បានអះអាងថា កីឡាករវ័យ ៣០ ឆ្នាំ Wilfried Zaha ត្រូវបានផ្តល់ជូនកិច្ចសន្យារយៈពេល ៣ ឆ្នាំដែលមានតម្លៃ ៤៥ លានផោន ឬ ១៥ លានផោនក្នុងមួយឆ្នាំៗ ពីសំណាក់ក្លិបអ្នកមានអារ៉ាប៊ីសាអូឌីត Al Nassr ដែលកំពូលខ្សែប្រយុទ្ធ Cristiano Ronaldo កំពុងលេងនៅទីនោះ។

ខ្សែប្រយុទ្ធអន្តរជាតិកូតឌីវ័រ Zaha ដែលនឹងក្លាយជាភ្នាក់ងារឥតគិតថ្លៃនៅរដូវក្តៅនេះ ក៏ត្រូវបានក្លឹបយក្សអេស្ប៉ាញ Atletico Madrid និងក្លឹបបីផ្សេងទៀតលេងមានកៅអីលេងនៅក្របខណ្ឌលំដាប់ទី១ អឺរ៉ុប Champions League ចាប់អារម្មណ៍ចង់បានតារាជើងស៊ុតរូបនេះផងដែរ។

ទោះជាយ៉ាងណាក៏ដោយ កីឡាករអន្តរជាតិកូតឌីវ័រ ដែលនឹងផុតកុងត្រាជាមួយក្លិបអង់គ្លេស Crystal Palace នៅចុងខែមិថុនានេះ មិនទាន់បានធ្វើការសម្រេចចិត្តលើអនាគតរបស់គាត់នៅឡើយទេ ហើយចង់វាយតម្លៃទៅលើជម្រើស ដែលរូបគេទទួលបានទាំងអស់ថាមួយណាជាជម្រើសល្អបំផុត។

Wilfried Zaha បង្ហាញខ្លួនបាន ៤៥៨លើកក្នុងការប្រកួតទាំងអស់សម្រាប់ក្លិប Crystal Palace ដោយស៊ុតបញ្ចូលទីបាន ៩០ គ្រាប់ និងបញ្ជូនបាល់ឱ្យមិត្តរួមក្រុមបានចំនួន ៧៦ ដង។ ប្រសិនបើ Zaha ផ្លាស់ទៅលេងនៅអារ៉ាប៊ីសាអូឌីតពិតមែននោះ រូបគេមិនមែនជាកីឡាករលំដាប់កំពូលតែម្នាក់គត់ មកលេងនៅតំបន់អាស៊ីយើងនោះទេ។

ជាមួយគ្នានេះ កំពូលខ្សែប្រយុទ្ធម្នាក់ទៀតគឺ Karim Benzema ដែលទើបនឹងប្រកាសចូលរួមជាមួយក្លិប Al Ittihad រហូតដល់ឆ្នាំ ២០២៦ ដោយរកបានប្រហែល ៤០០ លានអឺរ៉ូសម្រាប់រយៈពេល ២ រដូវកាល បូករួមទាំងប្រាក់រង្វាន់ប្រហែល ២០ លានអឺរ៉ូសម្រាប់ការធ្វើជាទូតសុឆន្ទៈក្នុងការដេញថ្លៃធ្វើជាម្ចាស់ World Cup 2030។ កីឡាករសញ្ជាតិបារាំង បានទៅដល់ក្លឹបថ្មីរបស់គាត់ហើយ បន្ទាប់ពីបាននិយាយលាដល់អតីតក្លឹប Real Madrid របស់គាត់៕អានពត៌មានប្រចាំថ្ងៃ