បន្ទាប់ពីកីឡាករសញ្ជាតិបេឡារុស នីគីតា ជីរ៉ាសីម៉ូវីស បង្ហាញកាយវិការមិនអស់ចិត្ត អំឡុងពេលអាជ្ញាកណ្ដាលបញ្ឈប់ការប្រកួតភ្លាមៗ ក្រោយអ្នកលេងពូថៅដៃពិឃាត ធឿន ធារ៉ា ដាល់ចំមុខ និងដងខ្លួនពេញៗរាប់ដល់ ១០ មិនទាន់ដឹងស្មារតី កាលពីថ្ងៃអាទិត្យទី១០កញ្ញា ឆ្នាំ២០២៣ ពេលនេះ សង្វៀនទូរទស្សន៍ថោនបានផ្សំផ្គុំអ្នកទាំងពីរឱ្យជួបគ្នាជាថ្មីម្ដងទៀត នៅក្នុងកម្មវិធីសេនាគុនខ្មែរយ័ន្ត៨ទិស នាថ្ងៃឆ្លងខែមីនានេះ។ យ៉ាងណា ធឿន ធារ៉ា បានបោះសម្តីជូន នីគីតា ជីរ៉ាសីម៉ូវីស ថា មកម្តងនេះអ្នកនឹងអស់ចិត្តមិនខាន…។
គេនៅចាំបានថា កីឡាករបេឡារុស នីគីតា ជីរ៉ាសីម៉ូវីស អាចស៊ូនឹងកណ្តាប់ដៃមហាទម្ងន់របស់អ្នកលេងពូថៅដៃពិឃាត ធឿន ធារ៉ា បានត្រឹមតែពាក់កណ្តាលនៃទឹកទី២ប៉ុណ្ណោះ កាលពីជួបគ្នាលើកដំបូងក្នុងព្រឹត្តិការណ៍អ្នកប្រមាញ់គុនខ្មែរទាំង៥។
គ្រាន់តែសំឡេងស្នូរជួងបន្លឺឡើងភ្លាម កីឡាករ ធឿន ធារ៉ា បានសម្រុកវាយសន្ធាប់ទៅលើកីឡាករ នីគីតា ជីរ៉ាសីម៉ូវីស តែម្ដង ប៉ុន្តែកីឡាករសញ្ជាតិបេឡារុសរូបនេះ ហាក់ដឹងពីស្នៀតប្រយុទ្ធរបស់អ្នកលេងពូថៅដៃ ហើយបានព្យាយាមរលាស់ខ្លួនគេចចេញពីព្យុះកណ្តាប់ដៃដែលវាយសម្រុក ប្រៀបបាននឹងថ្មភ្នំធំៗរមៀលធ្លាក់សំដៅមកលើរករូបគេ ស្ទើរតែរកពេលដកដង្ហើមមិនបាន។
តែយ៉ាងណា ក្រោយផ្លាសប្តូរបច្ចេកទេស អ្នកលេងពូថៅដៃពិឃាត ធឿន ធារ៉ា បានបិទបញ្ចប់ដំណើរផ្សងព្រេងរបស់កីឡាករ នីគីតា ជីរ៉ាសីម៉ូវីស លើសមរភូមិនៃសង្វៀនគុនខ្មែរត្រឹមពាក់កណ្តាលទឹកទី២ បន្ទាប់ពីលោកអាជ្ញាកណ្ដាលរាប់កីឡាករ នីគីតាដល់១០ ហើយរូបគេនៅមិនទាន់បាត់វង្វេង។ ភ្លាមៗកីឡាករ នីគីតា ជីរ៉ាសីម៉ូវីស ហាក់មិនពេញចិត្តនឹងការសម្រេចចិត្តរបស់លោកអាជ្ញាកណ្ដាលកាត់សេចក្តីទេ ព្រោះរូបគេយល់ថា អាចនៅប្រកួតបន្តបាន។
ដើម្បីឱ្យកីឡាករ នីគីតា ជីរ៉ាសីម៉ូវីស អស់ចិត្ត និងដើម្បីកុំឱ្យមានពាក្យចោទពីផ្ទះលេខពីរថា ការមកប្រកួតលើទឹកដីខ្មែរ កីឡាករបរទេសហាក់ចាញ់ប្រៀបជាងកីឡាករម្ចាស់ផ្ទះ ទាំងដែលពួកគេអាចនៅប្រកួតបានតទៅទៀតនោះ (តែធាតុពិតកំពុងវង្វេង Sic.) ដូច្នេះហើយ ទើបថោនរៀបចំឱ្យមានការប្រកួតជម្រះបញ្ជីគ្នាសាជាថ្មីម្ដងទៀត ដើម្បីបញ្ចប់ភាពមន្ទិលរបស់អ្នកលេងគុនខ្មែរមកពីបរទេស និងលាងជម្រះការចោទប្រកាន់របស់ផ្ទះលេខពីរ ដែលព្យាយាមជាន់ពន្លិចគុនខ្មែរ។
បន្ទាប់ពីបានដឹងថា ដៃគូចាស់ កីឡាករ នីគីតា ត្រូវឡើងសង្វៀនជាមួយខ្លួនសាជាថ្មី នាថ្ងៃទី៣១មីនាខាងមុខ អ្នកលេងពូថៅដៃពិឃាត ដែលភាគច្រើនប្រើប្រាស់សមត្ថភាពដ៏អង់អាចរបស់ខ្លួនលើសង្វៀនបកស្រាយជំនួសឱ្យការនិយាយអួតចេញពីមាត់ បានបោះពាក្យសម្តីដ៏កម្រឱ្យ កីឡាករ នីគីតា ជីរ៉ាសីម៉ូវីស ថា មកម្តងនេះអ្នកនឹងអស់ចិត្ត! សម្តីនេះដ្បិតថាខ្លី ប៉ុន្តែមានន័យគ្រប់គ្រាន់ឱ្យ កីឡាករ នីគីតា ជីរ៉ាសីម៉ូវីស យកទៅដេកពិចារណា ខណៈការប្រកួតនៅសល់តែ៣ថ្ងៃទៀតប៉ុណ្ណោះនឹងមកដល់។
ទោះជាយ៉ាងណា អ្នកគាំទ្រគុនខ្មែរ នៅតែជឿជាក់លើសមត្ថភាពកីឡាករ ធឿន ធារ៉ា ថាអាចផ្តួល កីឡាករ នីគីតា ជីរ៉ាសីម៉ូវីស មិនឱ្យលើសពីទឹកទី១ទេ សម្រាប់ការជួបគ្នាលើកទី២នេះ ដ្បិតថា ការតាំងចិត្តខ្ពស់របស់អ្នកលេងពូថៅដៃពិឃាតនៅពេលនេះ គឺច្បាស់ណាស់ថា គ្រូពេទ្យត្រូវតែត្រៀមគ្រែស្នែងជាចាំបាច់ ព្រោះកីឡាករ ធឿន ធារ៉ា កម្រនឹងអួតអាងពីសមត្ថភាពរបស់ខ្លួនណាស់ ហើយក៏មិនដែលមើលស្រាលដៃគូដែរ ប៉ុន្តែបើគេហ៊ានបោះសម្តីបែបនេះហើយ កីឡាករ នីគីតា អាចនឹងជួបរឿងមួយនឹកស្មានមិនដល់មិនខាន។
បន្ថែមលើនេះ អ្នកគាំទ្រគុនខ្មែរសង្ឃឹមថា កីឡាករ នីគីតា ជីរ៉ាសីម៉ូវីស អាចនឹងតស៊ូជាមួយ កីឡាករ ធឿន ធារ៉ា រហូតបញ្ចប់ទឹកទី៣បានមិនខាន ព្រោះបើសន្លប់លឿនពេក វាអាចនឹងធ្វើឱ្យកីឡាករបរទេសផ្សេងទៀត លែងហ៊ានជួបជើងខ្លាំងរបស់កម្ពុជារូបនេះតទៅទៀត។
ចុះបងប្អូនដែលកំពុងទស្សនាវីដេអូនេះ យល់ថា កីឡាករ នីគីតា ជីរ៉ាសីម៉ូវីស អាចតស៊ូជាមួយ កីឡាករ ធឿន ធារ៉ា បានដល់ទឹកទីប៉ុន្មាន..? សូមទម្លាក់មតិបងប្អូនក្នុងប្រអប់សារខាងក្រោមនេះ…៕អានពត៌មានប្រចាំថ្ងៃ