អស្ចារ្យណាស់..! កម្ពុជាដណ្តើមបានមេដាយសរុប១០០គ្រឿង

ក្រោយក្រុមបាល់ទះកម្ពុជាឈ្នះមេដាយប្រាក់លើវិញ្ញាសាបាល់ទះបុរស នៅយប់ថ្ងៃទី០៨ ខែឧសភា ឆ្នាំ២០២៣នេះ ក្រុមអត្តពលិកកម្ពុជា បានដណ្តើមមេដាយសរុប១០០គ្រឿង ពីព្រឹត្តិការណ៍កីឡាស៊ីហ្គេមលើកទី៣២ នៅកម្ពុជា ដោយដណ្តើមបានមេដាយមាស ៣៦គ្រឿង មេដាយប្រាក់៣១គ្រឿង និងមេដាយសំរឹទ្ធ៣៣គ្រឿង…។

ស៊ីហ្គេមនៅកម្ពុជា កំពុងធ្វើឱ្យប្រទេសនៅក្នុងតំបន់មានការភ្ញាក់ផ្អើលជាខ្លាំង បន្ទាប់ពីក្រុមអត្តពលិកកម្ពុជា បង្ហាញសមត្ថភាពដ៏អស្ចារ្យដណ្តើមបានមេដាយទាំងបីប្រភេទលើសបណ្តាប្រទេសខ្លាំងៗមួយចំនួនដូចជា ឥណ្ឌូណេស៊ី ថៃ វៀតណាម និងហ្វីលីពីន ខណៈបណ្តាប្រទេសទាំងនេះ តែងមានប្រៀបលើកម្ពុជាដាច់ឆ្ងាយតែម្ដង។

ប្រទេសថៃគិតត្រឹមម៉ោង២១ៈ០០នាទីយប់ថ្ងៃទី០៨ឧសភានេះ ឈរនៅលេខរៀងទី២ ដណ្តើមបានមេដាយមាស ២៦គ្រឿង ប្រាក់២០គ្រឿង និងសំរឹទ្ធ៣០គ្រឿង។

ប្រទេសវៀតណាម ឈរនៅលេខរៀងទី៣ ដណ្តើមបានមេដាយមាស២៥គ្រឿង មេដាយប្រាក់២៣គ្រឿង និងមេដាយសំរឹទ្ធ៣៦គ្រឿង ខណៈប្រទេសឥណ្ឌូណេស៊ី ដណ្តើមបានមេដាយមាស១៨គ្រឿង មេដាយប្រាក់១៧គ្រឿង និងមេដាយសំរឹទ្ធ៤១គ្រឿង ឈរលំដាប់លេងរៀងទី៤ ឬ(Top 4 Medal in Sea Games 32nd)។

យ៉ាងណា ក្រុមអត្តពលិកកម្ពុជានៅមានវិញ្ញាសាច្រើនទៀតដែលត្រូវប្រកួតប្រជែងដណ្តើមយកមេដាយជូនជាតិ ដូចនេះ មេដាយកម្ពុជាមិននៅទ្រឹងត្រឹមហ្នឹងទេ ពោលគឺនឹងឡើងបន្តទៀតនៅថ្ងៃស្អែក ខណៈវិញ្ញាសាដែលមានសក្តានុពលរបស់កម្ពុជានៅមានច្រើនទៀត ក្នុងការប្រជែងយកមេដាយណាមួយ។

ប្រទេសកម្ពុជា បានកាន់កាប់តំណែងកំពូលតារាងមេដាយមាសអស់រយៈពេល៥ថ្ងៃជាប់ៗគ្នាជាប្រវត្តិសាស្ត្រ នៃព្រឹត្តិការណ៍កីឡាអាស៊ីអាគ្នេយ៍មួយនេះ។ យ៉ាងណា អង្គភាពសារព័ត៌មាន SBM News សូមជូនពរក្រុមអត្តពលិកកម្ពុជាទាំងអស់ ទទួលបានជោគជ័យ ក្នុងការប្រកួតប្រជែងដណ្តើមយកមេដាយទាំងបីប្រភេទជូនប្រទេសជាតិនៅថ្ងៃស្អែកបន្តទៀត ស្របពេលដែលពិភពលោកកំពុងសម្លឹងមើលមកកម្ពុជា ។

ដោយក្រសែភ្នែកភ្ញាក់ផ្អើលជាខ្លាំង ពីភាពរីកចម្រើននៃវិស័យកីឡានៅកម្ពុជា ក្រោមដំបូលសន្តិភាព ដូច្នេះ សូមអត្តពលិកទាំងអស់ត្រូវមានស្មារតីមោះមុត ដើម្បីសម្រេចគោលដៅរបស់ខ្លួនក្នុងការនាំយកមេដាយពីព្រឹត្តិការណ៍ដ៏ប្រចាំតំបន់មួយនេះ តាមតែអាចធ្វើទៅបាន…៕អានពត៌មានប្រចាំថ្ងៃ