ហេតុអ្វីបានជារៀបចំការប្រកួតគុនខ្មែរពិភពលោក?

កម្ពុជា​នឹង​រៀបចំ​ព្រឹត្តិការណ៍​ប្រកួត​គុនខ្មែរ​ពិភព​លោក លើក​ទី៤ ​ថ្ងៃ​ទី​២៦-២៧-២៨ ខែ​វិច្ឆិកា ឆ្នាំ​២០២៣ នៅ​​ទឹក​ដី​ប្រាសាទ​អង្គរវត្ត ខេត្ត​សៀមរាប ដែល​មាន​សហព័ន្ធ​កីឡា​គុន​ខ្មែរ​អន្តរជាតិ​ជាង​១០​ប្រទេស​ចូល​រួម​។

លោក វ៉ាត់ ចំរើន អគ្គលេខាធិការ​នៃ​គណៈកម្មាធិការ​ជាតិ​កម្ពុជា (NOCC) និង​ជា​រដ្ឋ​លេខាធិការ​​ក្រសួង​អប់រំ យុវជន និង​កីឡា​បាន​លើក​ឡើង​ថា ​ការ​រៀបចំ​ព្រឹត្តិការណ៍​ប្រកួត​គុន​ខ្មែរ​ពិភព​លោក​គឺ​មាន​​គោល​បំណងសម្រាប់​ខ្មែរ​ទាំង​អស់​គ្នា​ ពី​ព្រោះ​នេះ​ជា​កីឡា​អត្តសញ្ញាណ​ជាតិ​របស់​ខ្មែរ​។ ​ខ្មែរ​​ទាំង​​អស់​គ្នា​​​នៅ​ក្នុង​ និង​ក្រៅ​​ប្រទេស​មាន​ទ្រព្យ​សម្បត្តិ​ដែល​ជា​អត្តសញ្ញាណ​​របស់​ខ្លួន។

សម្រាប់​ការ​ប្រកួត​គុន​ខ្មែរ​ពិភព​លោក លើក​ទី​៤ នៅ​ខេត្ត​សៀមរាប​មាន​វិញ្ញាសា​ជា​ច្រើន​ទាំង​បុរស និង​នារី ដែល​ត្រូវ​បាន​បែង​ចែក​ជា​៣​ប្រភេទ​គឺ​កម្រិត​ស្ម័គ្រ​ចិត្ត ពាក់​កណ្តាល​អាជីព និង​អាជីព ដែល​​ត្រូវ​​​ផ្តល់​សញ្ញាប័ត្រ មេដាយ និង​ខ្សែ​ក្រវាត់​កម្រិត​ពិភព​លោក​ដល់​ជយលាភី។

២០២៣​ជា​ឆ្នាំ​ដែល​​កីឡា​អត្តសញ្ញាណ​ជាតិ​​«គុន​ខ្មែរ»​​​​រីក​ចម្រើន​​យ៉ាង​ឆាប់​រហ័ស​ បន្ទាប់​ពី​ត្រូវ​បាន​ដាក់​បញ្ចូល​ក្នុង​កីឡា​ស៊ីហ្គេម លើក​ទី​៣២ ឆ្នាំ​២០២៣ និង​ត្រូវ​បាន​ពិភព​លោក​ចាប់​អារម្មណ៍​រហូត​មាន​ប្រទេស​ជាង​៦០​បាន​ចូល​ជា​សមាជិក​សហព័ន្ធ​កីឡា​គុន​ខ្មែរ​អន្តរជាតិ៕អានពត៌មានប្រចាំថ្ងៃ