កីឡាករអ៊ីរ៉ង់ ហាសាន់ អាចនឹងប៉ះគ្នាជាមួយនឹងអ្នកលេងពូថៅពិឃាត ធឿន ធារ៉ា នេះបើយោងទៅតាមរយៈការឆ្លើយឆ្លងគ្នានៅក្នុង Comment រវាងពិធីកររូបសង្ហារ MC Vutha និងគ្រូបង្វឹករបស់គេ ។
អ្នកគាំទ្រចុចឈ្មោះចំៗថាមានតែកីឡាករគុនខ្មែររូបនេះទេទើបអាចបញ្ឈប់ភាពខ្លាំងរបស់កីឡាករ ហាសាន់ វ៉ាដានី បាន
យើងបានដឹងហើយថាកាលពីថ្ងៃទី 28 កន្លងទៅថ្មីនេះ កីឡាករ ហាសាន់ ទើបតែបានបំបាក់អ្នកលេងអំបោះឆៅ ធន់ រិទ្ធី ត្រឹមទឹកទីមួយអោយសន្លប់បាត់មាត់ជ្រាបរាប់មិនខ្ចីងើប នៅក្នុងកម្មវិធីគ្រុឌគុនខ្មែរ និងដណ្តើមបានខ្សែក្រវាត់មួយខ្សែផងដែរ ។
បន្ទាប់ពីដណ្តើមបានខ្សែក្រវាត់រួចមក ហាសាន់ ក៏បាននាំយកសមិទ្ធផលរបស់ខ្លួនទៅជូនក្លឹប មិត្តរួមក្រុម ក៏ដូចជាអតីតកំពូលអ្នកប្រដាល់ជើងខ្លាំងរបស់ថៃ យ៉ន សែនក្លៃ ផងដែរ ។ បើយើងមើលទៅតាមទឹកមុខរបស់ពួកគេហាក់បង្ហាញអោយឃើញថា ពួកគេពិតជាពេញចិត្តនឹងជ័យជម្នះមួយនេះខ្លាំងណាស់ ។
យ៉ាងណាមិញក្រោយពីបានឃើញសមត្ថភាពរបស់កីឡាករ ហាសាន់ ធ្វើអោយអ្នកគាំទ្រគុនខ្មែរបាននាំគ្នាបញ្ចេញជាមតិឡើងថា ក្រៅពី ធឿន ធារ៉ា មិនមានកីឡាកររូបណាអាចបញ្ចប់ភាពខ្លាំងរបស់កីឡាករអ៊ីរ៉ង់រូបនេះបានឡើយ ។ ដែលសូម្បីតែគ្រូបង្វឹករបស់គេក៏បានធ្វើការស៊ែរូបរបស់ ហាសាន់ ភ្ជាប់ជាមួយនឹង ធឿន ធារ៉ា អមដោយសំណេរថា Ok ផងដែរ ។
ដែលមានន័យថាលោកស្វាគមន៍គ្រប់ពេលប្រសិនបើអោយកូនសិស្សរបស់លោកជួបជាមួយកំពូលអ្នកប្រដាល់គុនខ្មែរ ធឿន ធារ៉ា ។ ភ្លាមៗនោះផងដែរបន្ទាប់ពីបានឃើញគ្រូរបស់កីឡាករ ហាសាន់ ចែករំលែករូបភាពរបស់ ធឿន ធារ៉ា ពិធីកររូបសង្ហារ Mc Vutha ក៏បានចូលទៅ Comment បែបសួរនាំលេងថា “ចង់ជួបពេលណា?”
គ្រូបង្វឹករបស់ ហាសាន់ តបថា “ពេលណាក៏បានស្រេចលើសហព័ន្ធកីឡាករប្រដាល់គុនខ្មែរផ្តល់អោយពួកយើង” ។ ដូច្នេះយើងនឹងអាចឃើញកីឡាករ ហាសាន់ ប៉ះគ្នាជាមួយនឹង ធឿន ធារ៉ា ហើយបើយោងទៅតាមការឆ្លើយឆ្លងនៅក្នុង Comment ដោយខាងគ្រូបង្វឹករបស់កីឡាករ ហាសាន់ រង់ចាំតែការបើកភ្លើងខៀវពីខាងយើងប៉ុណ្ណោះ ។ តែប៉ុណ្ណេះដឹងតែពេញលេងទឹកភ្លៀងទៀតហើយធីមយើង ។
គួរអោយដឹងផងដែរថាអ្នកលេងពូថៅពិឃាត ធឿន ធារ៉ា ធ្លាប់ប៉ះគ្នាជាមួយនឹង ហាសាន់ ម្តងរួចមកហើយដែលកាលនោះលទ្ធផលបានត្រឹមតែស្មើគ្នាតែប៉ុណ្ណោះ ។ ចុះបើប៉ះគ្នាម្តងទៀតតើបងប្អូនគិតថា ធឿន ធារ៉ា អាចជម្រះបញ្ជីចាស់បានដែរឬទេ ?