សៀង ចន្ធា នឹងត្រលប់ទៅកាន់កាតាវិញនាយប់នេះ ក្រោយជួយក្រុមជម្រើសជាតិជោគជ័យ

ខ្សែប្រយុទ្ធមុតស្រួចរបស់ក្រុមជម្រើសជាតិកម្ពុជា កីឡាករ សៀង ចន្ធា នឹងធ្វើដំណើរត្រលប់ទៅកាន់ប្រទេសកាតាវិញ នាវេលាម៉ោង១៩:៣០យប់ថ្ងៃទី១២ ខែកញ្ញា ឆ្នាំ២០២៣នេះ ក្រោយបំពេញភារកិច្ចក្នុងក្រុមជម្រើសជាតិកម្ពុជា (ក្រុមធំ) សម្រាប់ការប្រកួតមិត្តភាពអន្តរជាតិចំនួន២ ប្រកួតក្នុងថ្ងៃ FIFA Day ..។

ថ្លែងនៅក្នុងសន្និសីទសារព័ត៌មាននៅឯពហុកីទ្បដ្ឋានជាតិអូទ្បាំពិក ក្រោយពីចប់ការប្រកួតរវាងក្រុមជម្រើសជាតិកម្ពុជា និងចិន-ម៉ាកាវ ខ្សែប្រយុទ្ធ សៀង ចន្ធា បានប្រាប់ឱ្យដឹងថា៖«ហេតុផលដែលខ្ញុំប្រញាប់ត្រលប់ទៅកាន់ប្រទេសកាតាវិញ ដោយសារនៅថ្ងៃទី១៤ ខែកញ្ញា ឆ្នាំ២០២៣ ខាងមុខនេះ ក្រុម Al Shahaniya SC មានការប្រកួតលីគនៅក្រៅដី តតាំងជាមួយក្រុម Mesaimeer SC ជាហេតុដែលខ្ញុំត្រូវត្រលប់ទៅជួយក្រុមវិញ»។

គួររំឭកថា ក្នុងជំនួបមិត្តភាពអន្តរជាតិ FIFA Day កាលពីថ្ងៃទី១១ ខែកញ្ញា ក្រុមជម្រើសជាតិកម្ពុជា (ក្រុមធំ) បានយកឈ្នះលើក្រុមជម្រើសជាតិចិន-ម៉ាកាវ ក្នុងលទ្ធផល ៤-០ នៅឯពហុកីទ្បដ្ឋានជាតិអូទ្បាំពិក ខណៈដែល សៀង ចន្ធា រកបាន២គ្រាប់ម្នាក់ឯង មុនពេលប្រធានក្រុមខ្សែការពារ សឿយ វិសាល របស់ក្លឹបព្រះខ័នរាជស្វាយរៀង និងខ្សែប្រយុទ្ធ រ៉ឹង ប៊ុនហៀង របស់ក្លឹបវិសាខា រកបានម្នាក់មួយគ្រាប់បន្ថែមផងដែរ។

កីឡាករខ្សែប្រយុទ្ធ សៀង ចន្ធា បានចូលរួមជាមួយក្រុម Al-Shahanniya នៃក្របខណ្ឌលីគទី២ (Qatari Second Division) របស់ប្រទេសកាតា ក្រោមលក្ខខណ្ឌខ្ចីជើងពីក្រុមបឹងកេតរយៈពេលមួយរដូវកាល ដោយទទួលបានថ្លៃនឿយហត់ប្រមាណជាង៦ម៉ឺនដុល្លារសហរដ្ឋអាម៉េរិក ខណៈខ្សែប្រយុទ្ធវ័យ២០ឆ្នាំរូបនេះ បានក្លាយជាកីទ្បាករខ្មែរដំបូងគេ មានឱកាសទៅប្រកបអាជីពបាល់ទាត់នៅប្រទេសកាតា…៕អានពត៌មានប្រចាំថ្ងៃ