ម្តងនេះថោនលេងឈុតធំនៅថ្ងៃឆ្លងខែ គ្រប់គូនៅសង្វៀនសេនាគុនខ្មែរយ័ន្ត ៨ ទិស សុទ្ធតែប្រកួតដណ្តើមខ្សែក្រវាត់

ព្រឹត្តិការណ៍សេនាគុនខ្មែរយ័ន្ត៨ទិស ដែលរៀបចំដោយស្ថានីយទូរទស្សន៍ថោននៅថ្ងៃទី៣១ ខែមីនា ឆ្នាំ ២០២៤ ខាងមុខនេះ សុទ្ធតែប្រកួតដណ្តើមខ្សែក្រវាត់ទាំងអស់ ក្នុងនោះ កីឡាករ ធឿន ធារ៉ា បានដាឆក់ខ្សែក្រវាត់ IPCC Kun Khmer World Champion មួយគ្រឿង ដាក់ឱ្យ ជើងខ្លាំងមកពីរុស្សី នីគីតា ជីរ៉ាសីសីម៉ូវីស ដណ្ដើម ខណៈស្តេចនាគរាជ ចាន់ រតនា ត្រូវធ្វើការធ្ងន់ជាមួយបណ្តាស្តេចនាគរាជមកពី៣តំបន់ផ្សេងគ្នា ដើម្បីប្រជែងយកខ្សែក្រវាត់IPCCគុនខ្មែរ…។

ព្រឹត្តិការណ៍សេនាគុនខ្មែរយ័ន្ត៨ទិស ដែលគ្រោងនឹងលេងឈុតធំនៅដំណាច់ខែមីនានេះ គូឯកប្រចាំព្រឹត្តិការណ៍កីឡាករ ធឿន ធារ៉ា បានប្រកាសដាក់ខ្សែក្រវាត់ IPCC Kun Khmer World Champion ដែលរូបគេដណ្ដើមបានកាលពីអំឡុងប្រកួតជាមួយកីឡាករ សែន ច័ន្ទរិទ្ធីគុន ឱ្យកីឡាករសញ្ជាតិរុស្សី នីគីតា ជីរ៉ាសីសីម៉ូវីស ឡើងដណ្ដើម។

ចំណែកគូរងឯក គឺការប្រកួតម៉ារ៉ាតុននៃស្ដេចនាគរាជទាំង៤ ដណ្ដើមខ្សែក្រវាត់ IPCC Kun Khmer Champion ដែលរួមមាន៖ កីឡាករ ចាន់ រតនា គឺជាបេក្ខភាពស្តេចនាគរាជទី១ តំណាងឱ្យកម្ពុជា, ស្ដេចនាគសមុទ្ទតំណាងទិសខាងលិចមកពីប្រទេសមីយ៉ាន់ម៉ា កីឡាករ អេមវ៉េ, ស្ដេចនាគសមុទ្ទតំណាងទិសខាងជើងហោះមកពីម៉ុងហ្គោលី បាទើដេនី ណាំជីលម៉ា និងស្ដេចនាគរាជសមុទ្ទចិនខាងកើត កីឡាករ កឺ ជីងជុន។

រីឯជើងខ្លាំងក្នុង ប្រភេទទម្ងន់៦០គីឡូក្រាមវិញ កីឡាករដែលមានរហស្សនាម រាហ៊ូមាស ឈុត សេរីវាន់ថង ត្រូវជួបជាមួយកីឡាករឆ្លងដែនមកពីអាឡឺម៉ង់ ស៊ីលីវ វីតេហ្ស Siliu Vitez ដែលនឹងត្រូវដណ្ដើមខ្សែក្រវាត់ IPCC Kun Khmer Champion ដូចគ្នា។

ជាមួយគ្នា ទាយាទស្តេចប្រដាល់គុនខ្មែរទសចត្សរ៍ឆ្នាំ១៩៩០-២០០០ អេអាំម៉ារីន ភូថង ក៏ត្រូវមានភារកិច្ចឡើងដណ្តើមខ្សែក្រវាត់ IPCC Kun Khmer Champion ជាមួយកីឡាករមកពីប្រទេសរុស្សី សាវីលីត ឌូរូហ្កាស្ទេវ Savelit Dorogavtsev​ ពោលគឺទាំងកីឡាករ ចាន់ រតនា, ឈុត សេរីវាន់ថង, និងអេអាំម៉ារីន ភូថង ម្នាក់ៗសុទ្ធតែដណ្តើមខ្សែក្រវាត់ជើងឯកគុនខ្មែរ របស់ស្ថាប័ន IPCC កម្រិតជាតិប៉ុណ្ណោះ ។

ខណៈអ្នកឈ្នះខ្សែក្រវាត់កម្រិតនេះនឹងមានឱកាសឡើងទៅប្រកួតដណ្តើមខ្សែក្រវាត់IPCCគុនខ្មែរកម្រិតពិភពលោក ឬ IPCCKun Khmer World Champion ដូចជាកីឡាករ ធឿន ធារ៉ា និងកីឡាករ ព្រំ សំណាង​នាពេលកន្លងមក។ នេះបើយោងតាមការឱ្យដឹងពីអ្នករៀបចំកម្មវិធីប្រដាល់របស់ស្ថានីយទូរទស្សន៍ថោនបញ្ជាក់ប្រាប់។

ដោយឡែក ព្រឹត្តិការណ៍សេនាគុនខ្មែរយ័ន្ត៨ទិស នេះ ក៏នៅមានគូវិលជំុសន្សំពិន្ទុដណ្ដើមខ្សែក្រវាត់ IPCC Kun Khmer Champion ជំុទីបី សម្រាប់ពូលA ក្នុងប្រភេទទម្ងន់៦៣,៥គីឡូក្រាមចុំនួន២គូរទៀតរួមមាន៖ កីឡាករកម្ពុជា លី រិទ្ធី ជួបជាមួយកីឡាករមកពីអូបេគីស្ថាន អាសាដ និងកីឡាករកម្ពុជា រិទ្ធី សុផាត ជួបជាមួយកីឡាករមីយ៉ាន់ម៉ា ស្សាវ ម៉ូវស្សាវ ដើម្បីឡើងទៅវគ្គបន្ទាប់។

មានការលើកឡើងពីមហាជនថា សម្រាប់កម្មវិធីសេនាគុនខ្មែរយ័ន្ត៨ទិស ដែលរៀបចំដោយស្ថានីយទូរទស្សន៍ថោន នាចុងខែមីនានេះ នឹងកក្រើកខ្លាំងជាមិនខាន ព្រោះប្រជុំទៅដោយកីឡាករល្បីៗជួរមុខរបស់កម្ពុជា ឡើងបង្ហាញស្នៀតគុនខ្មែរបង្អួតភ្នែកមហាជននៅក្រុងតាខ្មៅនាថ្ងៃឆ្លងខែមីនាឈានចូលខែមេសា ខណៈគូឯកត្រូវបានមហាជនចាប់អារម្មណ៍ខ្លាំងជាងគេ ។

ព្រោះជាគូសងសឹក និងការដាក់ខ្សែក្រវាត់កម្រិតពិភពលោកមួយដែលមានកម្រិតស្ដង់ដារអន្តរជាតិ ឱ្យ ជើងខ្លាំងមកពីរុស្សី នីគីតា ជីរ៉ាសីសីម៉ូវីស ដណ្ដើម។ ដូច្នេះ យើងរង់ចាំមើលថា តើបុរសខ្លាឃ្មុំទឹកកក នីគីតា ជីរ៉ាសីសីម៉ូវីស មកពីរុស្ស៊ី អាចបំបែកកំណត់ត្រាបរាជ័យលើកមុនបានឬយ៉ាងណា..? ឬមួយក៏ត្រូវកីឡាករ ធឿន ធារ៉ា ឱ្យកាដូបន្ថែមទាំងការទាំងដើមបន្តទៀត…៕អានពត៌មានប្រចាំថ្ងៃ