ភ្នំពេញ — ទោះបីជាបានចាញ់កីឡាករចិន Jiang Chengbao ដោយសន្លប់ក្តៅៗក៏ដោយ ម្ចាស់មេដាយមាសស៊ីហ្គេមឆ្នាំ ២០២៣ ភួន ឡាំងកូស៊ីន មិនអស់ចិត្តទេ និងមានបំណងចង់ជម្រះបញ្ជីចាស់ជាមួយជើងខ្លាំងម្នាក់នេះម្តងទៀត។ ណង សាវ ក៏បានស្នើសុំប្រកួតសងសឹកជាមួយកីឡាករថៃ La Fun បន្ទាប់ពីបានចាញ់ពិន្ទុទាំងមិនអស់ចិត្ត។
កាលពីថ្ងៃទី ៦ ខែកក្កដា កន្លងមកនេះ នៅលើសង្វៀនប៉ុស្តិ៍លេខ៥ ក្នុងការប្រកួតមិត្តភាពអន្តរជាតិចំនួន៤គូ ភួន ឡាំងកូស៊ីន បានក្លាយជាកីឡាករកម្ពុជាតែម្នាក់គត់ ដែលបានចាញ់កីឡាករបរទេសដោយសន្លប់។ ការប្រកួតនេះមិនអនុញ្ញាតឱ្យប្រើកែង និងក្បាលជង្គង់ (អាចប្រើជាប្រយោលបាន) ដែលជាអ្វីដែលភួន ឡាំងកូស៊ីន មានការលំបាកក្នុងការទប់ទល់ជាមួយ Jiang Chengbao ដែលមានជំនាញឃីកបុកស៊ីងជាអាជីព។
Ariel Helwani បោះ KSI ជាអ្នកប្រឆាំងបន្ទាប់សម្រាប់ Jorge Masvidal បន្ទាប់ពីចាញ់ប្រដាល់ទៅ Nate Diaz
ភួន ឡាំងកូស៊ីន បាននិយាយក្រោយការប្រកួតថា៖ “គេវែង ល្អហើយលឿន ហើយការប្រកួតឃីកបុកស៊ីង ក៏ជាជំនាញរបស់គេដែរ។ បើសិនជាការប្រកួតគុនខ្មែរ ខ្ញុំអាចសង្ឃឹមឈ្នះ ព្រោះយើងអាចចាប់ឡាំជង្គង់ និងវាយកែងបាន។”
ក្នុងការប្រកួតនេះ ភួន ឡាំងកូស៊ីន បានព្យាយាមទាត់ជើងក្រោមនៃកីឡាករ Jiang Chengbao ប៉ុន្តែត្រូវបានវាយចូលពោះធ្ងន់ៗ និងសន្លប់ក្នុងទឹកទី ៣។ តែភួន ឡាំងកូស៊ីន មិនអស់ចិត្តនោះទេ ហើយបានបង្ហាញបំណងចង់ជម្រះបញ្ជីម្តងទៀត ប៉ុន្តែសុំពេលប្រកួតឱ្យបាន១-២ដង ទៀតសិន។
ឡាំងកូស៊ីន បញ្ជាក់ថា៖ “ដើម្បីកុំមានមាត់ពាក្យ គឺបើយើងចាញ់ឃីកបុកស៊ីង យើងត្រូវប្រកួតឃីកបុកស៊ីងទៀត ប៉ុន្តែខ្ញុំសុំឱ្យបានឡើងប្រកួត១-២ដងទៀតសិន ដើម្បីឱ្យរាងកាយរបស់ខ្ញុំបានល្អវិញ។”
ចំណែកឯ ណង សាវ ក៏បានបង្ហាញសំណើសុំសងសឹកជាមួយ La Fun ដែលបានប្រើគូដៃឆ្វេង ម៉ាត់ចូលផ្ទៃមុខ ណង សាវ ហើយទទួលបានជ័យជម្នះដោយពិន្ទុ។ ណង សាវ បាននិយាយថា៖ “ខ្ញុំពេញចិត្តទទួលយកលទ្ធផលចាញ់នេះ ប៉ុន្តែខ្ញុំក៏មានការសោស្តាយដែរ ហើយចង់សងសឹកម្តងទៀត។”
កីឡាករ La Fun បាននិយាយថា៖ “ខ្ញុំពិតជាសប្បាយចិត្ត ហើយក៏មិននឹកស្មានថា ខ្ញុំអាចធ្វើបានល្អមែនទែន សម្រាប់ការបង្ហាញខ្លួននៅលើសង្វៀននេះជាលើកទី២។” La Fun បានអះអាងថា នឹងខំប្រឹងធ្វើឱ្យបានកាន់តែល្អដើម្បីបំពេញតាមការចង់បានរបស់អ្នកគាំទ្រ៕