ព្រំ សំណាង បាត់ការគាំទ្រកាន់តែខ្លាំង ក្រោយរងបរាជ័យរបូតពានជើងឯកម៉ារ៉ាតុនគុនខ្មែរ

ព្រឹត្តិការណ៍រាជសីហ៍គុនខ្មែរ រៀបចំដោយស្ថានីយទូរទស្សន៍ថោន កាលពីរាត្រីថ្ងៃទី១១មេសា ឆ្នាំ២០២៤ ដែលមានការប្រកួតដណ្តើពានម៉ារ៉ាតុនជើងឯកបុរស៤នាក់ ឬ 4 Men Marathon Champion ហើយកីឡាករ ព្រំ សំណាង​ ជាបេក្ខភាពម្នាក់ដណ្តើមជាមួយកីឡាករបរទេសមកពី៣ប្រទេសផ្សេងគ្នារួមមាន៖ អ៊ីរ៉ង់ អាឡឺម៉ង និងអូបេគីស្ថាន ត្រូវបានមហាជនរិះគន់កីឡាករ ព្រំ សំណាង មិនសំចៃមាត់ ក្រោយរង់បរាជ័យយ៉ាងអាម៉ាសនៅវគ្គផ្តាច់ព្រ័ត្រ…។

ការទទួលរងបរាជ័យក្នុងនាមជាអ្នកប្រដាល់គុនខ្មែរ វាមិនជាបញ្ហាចោទសម្រាប់អ្នកគាំទ្រទេ ព្រោះកីឡាករពេលឡើងប្រកួតលើសង្វៀន គឺតែងមានឈ្នះមានចាញ់ជារឿងធម្មតា តែភាពអាម៉ាសដែលអ្នកគាំទ្ររិះគន់ពេញសង្វៀនប្រដាល់ និងតាមកញ្ចក់ទូរសព្ទដៃអំឡុងពេលផ្សាយផ្ទាល់នោះ គឺលោកអាជ្ញាកណ្ដាលកាត់សេចក្តីបានព្រមានកីឡាករ ព្រំ សំណាង រហូតដល់ទៅ៣ដងឱ្យប្រកួតអស់ពីសមត្ថភាព។

ខណៈដែលរូបគេឡើងសង្វៀនបានត្រឹមតែឈររាំពន់ពែន និងដកថយពីការដេញវ៉ៃសន្ធាប់របស់កីឡាករអ៊ីរ៉ង អាវីន មេប៊ូឌី តែប៉ុណ្ណោះ ហើយនៅទីបំផុតចៅក្រមកាត់សេចក្តីទាំង៥រូប បានផ្តល់ជ័យជម្នះទៅឱ្យកីឡាករ អាវីន មេប៊ូឌី ៥-០ ជាឯកច្ឆន្ទ។

សកម្មភាពប្រកួតរបស់កីឡាករ ព្រំ សំណាង កាលពីយប់មិញនេះ បាននិងកំពុងទាញទម្លាក់កេរ្តិ៍ឈ្មោះដែលរូបគេធ្លាប់ជាកីឡាករគុនខ្មែរជួរមុខរបស់កម្ពុជា ឱ្យមកនៅត្រឹមជាកីឡាករកំដរសង្វៀនប្រដាល់ ធ្វើឱ្យអ្នកទស្សនាការប្រកួតសាំចិត្ត និងបាត់បង់ការគាំទ្រកាន់តែខ្លាំងឡើងៗពីមួយប្រកួតទៅមួយប្រកួត។

អ្នកគាំទ្រជាច្រើនបានស្នើឱ្យកីឡាករ ព្រំ សំណាង ប្រញាប់ចូលនិវត្តន៍ប្រសិនបើចង់នៅសល់សំណល់កេរ្តិ៍ឈ្មោះខ្លះៗទុកក្នុងអារម្មណ៍អ្នកគាំទ្រ និងមហាជនខ្មែរ តែបើនៅបន្តឡើងសង្វៀនប្រកួតទាំងទម្រង់បែបនេះតទៅទៀត គឺច្បាស់ណាស់ថា កីឡាករ ព្រំ សំណាង និងក្លាយជាកីឡាករកម្ពុជាទី១ ដែលញាំញីទៅដោយការរិះគន់ពីមហាជនខ្លាំងបំផុតក្នុងប្រវត្តិសាស្ត្រនៃពិភពគុនខ្មែរសម័យបច្ចុប្បន្នមិនខាន។

អ្នកគាំទ្រម្នាក់ បានចូលទៅខម្មិនពេលកំពុងផ្សាយផ្ទាល់ថា «យប់មិញជាការប្រកួតដែលពូណាង អន់បំផុត ក្នុងនាមខ្ញុំជាអ្នកគាំទ្រ បើគាត់មិនកែ ខ្លាចឈឺចឹង ចប់ហើយ ពូណាង!» អ្នកខ្លះថា «ទៅវ៉ៃនៅណាក៏ចឹងដែរ ឈប់វ៉ៃទៅចាស់ហើយ!» អ្នកខ្លះបន្ថែមដោយភាពចំអកថា «ប៉ុណ្ណឹងបានហើយពូណាង វ៉ៃខ្លាំងរបៀបនេះ ខ្ញុំខ្មាសបរទេសជំនួស។
ពូសម្រាកទៅកុំខំដើម្បីគុនខ្មែរពេកអីពូណាង ទុកឱ្យក្មេងៗគេវ៉ៃទៅ ល្បីកម្មវិធីគេងាប់ហើយ បើពូឡើងទៅរាំលើសង្វៀនចឹង! (សើច)»។

ទាំងនេះ គ្រាន់តែជាមតិរិះគន់មួយក្នុងចំណោមមតិរិះគន់រាប់ពាន់ខម្មិននៅលើការផ្សាយផ្ទាល់ ដោយក្នុងនោះ អ្នកគាំទ្រមួយចំនួនបានរិះគន់ដោយការជេរប្រមាថថែមទៀតផង ដែលអង្គភាពសារព័ត៌មាន SBM News រក្សាសិទ្ធិមិនយកមកបង្ហាញក្នុងពេលនេះឡើយ ប៉ុន្តែសង្ឃឹមថា កីឡាករ ព្រំ សំណាង និងបានចូលទៅមើលការរិះគន់ទាំងអស់នោះ ហើយធ្វើការសម្រេចចិត្តសារជាថ្មីឡើងវិញ។

គួរបញ្ជាក់ផងដែរថា បើតាមអ្នកគាំទ្រគុនខ្មែរបង្ហោះសារលើបណ្តាញសង្គមជាច្រើនបង្ហាញថា ការប្រកួតរបស់កីឡាករ ព្រំ សំណាង កាលពីយប់មិញនេះ គឺជាការប្រកួតមួយដែលអាក្រក់មើលជាទីបំផុត ព្រោះត្រូវលោកអាជ្ញាកណ្ដាលព្រមានដល់ទៅ៣ដងហើយ នៅមិនព្រមប្រកួតឱ្យអស់ពីសមត្ថភាពរបស់ខ្លួនទៀត។

ស្របពេលនៅព្រឹកនេះដែរ លោក ហេង សុខឃន អគ្គលេខាធិការសហព័ន្ធប្រដាល់គុនខ្មែរ និងជាប្រធានសហព័ន្ធប្រដាល់ឃីកបុកស៊ីង បានបង្ហោះសារចំអកឡកលើយឱ្យកីឡាករ ព្រំ សំណាង ដោយភ្ជាប់ជាមួយរូបភាព៣សន្លឹកយ៉ាងដូច្នេះថា៖«មហាសង្រ្គាន្ត២០២៤មិនទាន់ចូលផង ព្រំ សំណាងស្រវឹងបាត់ ហើយទទួលបានកាដូរថ្មីមួយទៀតនៅលើវិថីគុនខ្មែរ(ស្ទីគ័រសើច)ម្ដងគេម្ដងយើង។

(វិន័យនាំមកនៅកិក្តិយសគ្រប់សកម្មភាពការងារ)»។ សារនេះ ដ្បិតថាពុំបង្ហាញពីការស្ដីបន្ទោស តែលោកបានបញ្ជាក់យ៉ាងច្បាស់ក្នុងរង្វង់ក្រចកពីភាពគ្មានវិន័យរបស់កីឡាករ ព្រំ សំណាង ទើបរូបគេរងបរាជ័យដ៏ជូរចត់មុនថ្ងៃឆ្លងឆ្នាំថ្មីមកដល់បែបនេះ..៕អានពត៌មានប្រចាំថ្ងៃ