CAMSOC-ភ្នំពេញ៖ ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានលើកឡើងថា ៖«ការកាត់សេចក្តីរបស់មន្ត្រីអាជ្ញាកណ្តាល-ចៅក្រមលើប្រភេទកីឡាវ៉ូវីណាម ក្នុងពេលប្រកួតកីឡាស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា ត្រូវតែត្រឹមត្រូវ យុត្តិធម៌ ដោយមិនបង្កការប៉ះទង្គិចផ្លូវអារម្មណ៍របស់ប្រតិភូ កីឡាករ កីឡាការិនីអាស៊ីអាគ្នេយ៍ ដែលនឹងចូលរួមប្រកួតក្នុងព្រឹត្តិការណ៍នេះឡើយ»។
ការលើកឡើងបែបនេះរបស់ឯកឧត្តម ត្រូវបានធ្វើឡើង ក្នុងសន្និសីទសារព័ត៌មាន នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) នារសៀលថ្ងៃទី២៤ ខែមីនា ឆ្នាំ២០២៣ ស្តីពីការធ្វើម្ចាស់ផ្ទះការប្រកួតកីឡាវ៉ូវីណាម ជើងឯកអាស៊ីអាគ្នេយ៍ លើកទី៦ ឆ្នាំ២០២៣ ពីថ្ងៃទី២៥ ដល់ថ្ងៃទី៣០ ខែមីនា ឆ្នាំ២០២៣ ដើម្បីត្រៀមឆ្ពោះទៅរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ នៅកម្ពុជា។
ឯកឧត្តម អ៊ូ រតនា បានសង្កត់ធ្ងន់យ៉ាងដូច្នេះថា ៖«ក្នុងនាមជាម្ចាស់ផ្ទះ យើងខិតខំចូលរួមបំពេញឱ្យបានម៉ឺងម៉ាត់បំផុតនូវការកាត់សេចក្តីដល់ការប្រកួតឱ្យបានត្រឹមត្រូវយុត្តិធម៌ មិនឱ្យលម្អៀង និងមិនឱ្យប៉ះពាល់ដល់អារម្មណ៍របស់កីឡាករ កីឡាការិនីអន្តរជាតិនានា ដូចការធ្លាប់បានលើកឡើងកន្លងមកនេះ ក្នុងពេលចូលរួមប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជានោះទេ។ យើងនឹងធ្វើឱ្យមានសុក្រឹតភាព សូម្បីតែគណៈកម្មាធិការប្រតិបត្តិ របស់សហព័ន្ធកីឡាវ៉ូវីណាមកម្ពុជា និងសហព័ន្ធកីឡាវ៉ូវីណាមអាស៊ីអាគ្នេយ៍ ក្នុងនាមកម្ពុជាជាប្រធានអាស៊ានប្តូរវេន ដែលយើងមានឯកឧត្តម ម៉ុង គឹមហេង ជាប្រធាន គឺបានដាក់គោលដៅមកយើងទាំងអស់គ្នា ត្រូវគោរពឱ្យបាននូវការកាត់សេចក្តីគ្រប់ការប្រកួត ប្រកបដោយតម្លាភាព»។
ឯកឧត្តមប្រធានសហព័ន្ធ បានបន្តថា៖ «ដើម្បីជៀសវាងការប៉ះពាល់អារម្មណ៍របស់កីឡាករ កីឡាការិនីចូលរួមប្រកួតស៊ីហ្គេម ២០២៣ គឺសមាជិកអាស៊ានទាំងមូល ត្រូវបានអនុញ្ញាតឱ្យនាំមន្ត្រីអាជ្ញាកណ្តាល-ចៅក្រមតែ២នាក់ប៉ុណ្ណោះ។ សហព័ន្ធកីឡាវ៉ូវីណាមកម្ពុជា ក្រោមកិច្ចសហការរបស់គណៈកម្មាធិការជាតិ CAMSOC នាំយកមន្ត្រីអាជ្ញាកណ្តាល-ចៅក្រមពីទ្វីបអឺរ៉ុបមកជួយដឹកនាំកាត់សេចក្តីការប្រកួតកីឡាវ៉ូវីណាម នាពេលស៊ីហ្គេម ២០២៣»។អានពត៌មានថ្មីៗប្រចាំថ្ងៃ