CAMSOC-វៀតណាម៖ ព្រះអគ្គិជ័យកីឡា និងភ្លើងគប់ សម្រាប់ការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ បានធ្វើដំណើរទៅដល់អាកាសយានដ្ឋានអន្តរជាតិណូយបាយ នាទីក្រុងហាណូយ ប្រទេសវៀតណាម ដោយសុវត្ថិភាព កាលពីរាត្រីថ្ងៃទី២២ ខែមីនា ឆ្នាំ២០២៣។
ការដង្ហែទៅប្រទេសវៀតណាម គឺដើម្បីត្រៀមរៀបចំប្រារព្ធធ្វើពិធីរត់ភ្លើងគប់ ជាផ្លូវការ ដែលនឹងធ្វើនៅក្នុងទីក្រុងហាណូយ ជុំវិញបឹង Ho Guom នាថ្ងៃទី២៤ ខែមីនា ឆ្នាំ២០២៣ ស្អែកនេះ។ ក្នុងកម្មវិធីថ្ងៃស្អែកនេះ ដែលជាថ្ងៃពិធីរត់ភ្លើងគប់កីឡា សិស្ស-និស្សិតរបស់កម្ពុជា ព្រមទាំងប្រជាជនកម្ពុជា ប្រហែលជា១០០នាក់ផងដែរ គ្រោងនឹងចូលរួម។
ជាមួយគ្នានេះ និស្សិតកម្ពុជា ២រូប លោក ម៉ាន់ បញ្ញា ដែលកំពុងសិក្សាថ្នាក់អនុបណ្ឌិត ផ្នែកវិទ្យាសាស្ត្រអប់រំ និងលោក ឈុន រ័ត្ន សិក្សាថ្នាក់អនុបណ្ឌិតដូចគ្នា ផ្នែកវិទ្យាសាស្ត្រកីឡា បានសម្ដែងការរីករាយ និងបង្ហាញមោទនភាពរៀងៗខ្លួន ចំពោះពិធីរត់ភ្លើងគប់កីឡា ក្នុងតំបន់មួយនេះ។
ម៉ាន់ បញ្ញា បាននិយាយដូច្នេះថា៖ «ខ្ញុំទទួលបានព័ត៌មានពីកម្ពុជាមក គឺថាមានភាពគគ្រឹកគគ្រេងមែនទែន សម្រាប់កម្មវិធីនេះ ហើយក្នុងនាមជានិស្សិតខ្មែរ ខ្ញុំពិតជាមានសេចក្ដីសោមនស្សរីករាយ ដែលបានចូលរួមក្នុងកម្មវិធីដង្ហែព្រះអគ្គិជ័យកីឡានេះ គឺវាពិតជាមានអត្ថន័យធំធេងមែនទែន»។
«ក្នុងនាមយើងជាម្ចាស់ផ្ទះ ហើយយើងបានដង្ហែព្រះអគ្គិជ័យកីឡាយើងនេះ គឺរួមចំណែកសាយភាយឱ្យពិភពលោក ឬក៏កីឡានៅក្នុងអាស៊ានទាំងមូលនេះឱ្យបានស្គាល់ពីកីឡា និងស្នាដៃផ្សេងៗរបស់កម្ពុជាយើង។ លើសពីនេះ វាក៏ជាការជំរុញទឹកចិត្តកូនខ្មែរ ជាពិសេសអត្តពលិកខ្មែរឱ្យខិតខំហ្វឹកហាត់ ដើម្បីចូលរួមកម្មវិធីធំៗតទៅមុខទៀត និងដណ្ដើមមេដាយមាសឱ្យបានច្រើនផងដែរ»។លោក ម៉ាន់ បញ្ញា បានបញ្ជាក់បន្ថែម។
ដោយឡែក លោក ឈុន រ័ត្ន បានបង្ហាញចំណាប់អារម្មណ៍ថា៖ «សម្រាប់ខ្ញុំបាទផ្ទាល់ជាពលរដ្ឋខ្មែរ១រូប និងជានិស្សិតកំពុងបន្តការសិក្សា នៅប្រទេសវៀតណាម ហើយដែលនឹងចូលរួមកម្មវិធីដង្ហែព្រះអគ្គិជ័យកីឡា ថ្ងៃស្អែកនេះ ខ្ញុំពិតជាមានមោទនភាពទាំងចំពោះខ្លួនឯង និងចំពោះជាតិទាំងមូល ដ្បិតយើងពុំដែលទទួលសិទ្ធិធ្វើជាម្ចាស់ផ្ទះស៊ីហ្គេមពីមុនមកឡើយ»។ តាមគម្រោង ពិធីរត់ភ្លើងគប់ និងធ្វើឡើងនៅវេលាម៉ោង ៩ព្រឹក ថ្ងៃទី២៤ ខែមីនា ឆ្នាំ២០២៣៕ព័ត៌មានកីឡាប្រចាំថ្ងៃ