ការប្រកួតការពារខ្សែក្រវាត់ IPCC រាជសីហ៍គុនខ្មែរ កម្រិតពិភពលោក ក្រោមការរៀបចំពីស្ថានីយទូរទស្សន៍ថោន កាលពីរាត្រីថ្ងៃទី០៨សីហា ឆ្នាំ២០២៤ ទោះគ្មានវត្តមាន គ្រូធំ អេ ភូថង នៅក្បែរជួយប្រាប់ពីចំណុចខ្សោយដៃគូយ៉ាងណាក្ដី កីឡាករ ធឿន ធារ៉ា នៅតែបង្ហាញភាពខ្លាំង តាមរយៈផ្ដួលដៃគូហោះឆ្លងទ្វីបមកពីតំបន់អឺរ៉ុប អេឌី រ៉ុស ទាំងដែលមហាជនមួយចំនួនបារម្ភថា អ្នកលេងពូថៅដៃពិឃាដ អាចនឹងផ្លុំផេះលែងហុយ…។
ការប្រកួតការពារខ្សែក្រវាត់IPCC រាជសីហ៍គុនខ្មែរ រវាងកីឡាករ ធឿន ធារ៉ា ជាមួយកីឡាករ អេឌី រ៉ុស បានបញ្ចប់ទៅត្រឹមតែ២ទឹកប៉ុណ្ណោះ ព្រោះតែកីឡាករហោះឆ្លងទ្វីបមកពីសាធារណរដ្ឋដូមីនីកេន មិនអាចតស៊ូក្រោកមកប្រកួតតទល់ទៀតបាន បន្ទាប់ពីទទួលរងនូវផ្លែពូថៅដៃពិឃាដ កណ្ដាប់ដៃមហាទម្ងន់ និងជង្គង់ហោះរបស់កីឡាករជួរមុខកម្ពុជា។
គួររំឭកដែរថា នៅមុនពេលប្រកួតការពារខ្សែក្រវាត់ រវាងអ្នកលេងពូថៅដៃពិឃាដ ធឿន ធារ៉ា ជាមួយជើងខ្លាំងមកពីសាធារណរដ្ឋដូមីនីកេន វាយដំណាងឱ្យប្រទេសអេស្បាញ កីឡាករ អេឌី រ៉ុស មកដល់ មានការជជែកវែកញែកពីសំណាក់មហាជននិយមវិស័យកីឡាប្រដាល់គុនខ្មែរ និងបានធ្វើការព្យាករថា កីឡាករ ធឿន ធារ៉ា អាចនឹងផ្លុំផេះលែងហុយហើយម្ដងនេះ ព្រោះ កីឡាករ អេឌី រ៉ុស ជាជើងខ្លាំងមួយរូបដែលមានប្រវត្តិប្រកួតប្រដាល់គុនខ្មែរមិនធម្មតា។
ការព្យាករពីមហាជនលើពាក្យ ផ្លុំផេះលែងហុយ សំដៅលើថា កីឡាករ ធឿន ធារ៉ា នឹងធ្វើការធ្ងន់ជាងពេលប្រកួតណាៗទាំងអស់ ព្រោះការប្រកួតការពារខ្សែក្រវាត់ម្ដងនេះ គឺការប្រកួតម្ដងនេះ ថោនយកកីឡាករជើងខ្លាំងលំដាប់ពិភពលោកមួយដែលមានប្រវត្តិប្រកួតមិនធម្មតា និងមានបទពិសោធជោគជាំលើវិស័យប្រដាល់ ដោយរូបគេអាចប្រកួតបាន៥វិញ្ញាសាខុសៗគ្នា ពិសេសគឺបទពិសោធជោគជាំនៅសង្វៀនផ្ទះលេខ២ ដែលហ្វឹកហាត់ក្បាច់គុនចម្លងពីខ្មែរផងដែរ។
យ៉ាងណា អ្នកលេងពូថៅដៃពិឃាដ ធឿន ធារ៉ា បានបិទបញ្ចប់មន្ទិលសង្ស័យរបស់មហាជន តាមរយៈការផ្តួលដៃគូឱ្យបោះបង់ការប្រកួតនៅទឹកទី២ និងបង្ហាញភាពខ្លាំងរបស់ខ្លួននៅលើសង្វៀនប្រដាល់គុនខ្មែរ ក្នុងនាមជាកីឡាករជួរមុខរបស់ប្រទេស។ មែនទែនទៅ ការប្រកួតឈ្នះចាញ់គឺជារឿងកីឡា ប៉ុន្តែ កីឡាករ ធឿន ធារ៉ា ហាក់មិនដែលធ្វើឱ្យអ្នកគាំទ្ររបស់ខ្លួនខកបំណងលើការប្រកួតម្ដងណាឡើយ ទោះបីជាការប្រកួតនោះចាញ់ឬឈ្នះ រូបគេតែងតែប្រកួតអស់ពីសមត្ថភាព ដែលចំណុចនេះហើយធ្វើឱ្យកេរ្តិ៍ឈ្មោះ ធឿន ធារ៉ា លេចត្រដែតឡើងខ្លាំងក្នុងវិស័យកីឡាប្រដាល់គុនខ្មែរ។
ទោះយ៉ាងណា មហាជនកោតសរសើរ កីឡាករ អេឌី រ៉ុស ថាពិតជាមិនធម្មតា ស្នៀតប្រយុទ្ធ ការបន្លាស់ទីកំឡុងពេលប្រកួត និងការឈ្វេងយល់ពីប្រដាល់គុនខ្មែរក៏ច្បាស់លាស់ដែរ ដែលកីឡាករកម្ពុជាផ្សេងទៀត ក្រៅពី ធឿន ធារ៉ា អាចនឹងជួបការលំបាកនោពេលជួបជាមួយកីឡាករ អេឌី រុស នាពេលខាងមុខ។ ទម្ងន់ដៃ រន្ទះជើង ជង្គង់ហោះ និងអាវុធដ៏គ្រោះថ្នាក់ប្រចាំត្រកូល គឺពូថៅដៃកែងពិឃាដ ដែលកីឡាករ ធឿន ធារ៉ា ប្រើទៅលើ កីឡាករ អេឌី រ៉ុស ពិតជាគួរឱ្យខ្លាចខ្លាំងណាស់។
ស្នៀតប្រយុទ្ធមួយក្បាច់ៗ ដែល ធឿន ធារ៉ា វាយចេញមានភាពសាហាវ និងច្បាស់ៗជាទម្រង់គុនខ្មែរពិតៗ មិនថាកណ្តាប់ដៃដាល់ចេញ ឬការប្រើរន្ទះជើងទាត់សន្ធាប់ទេ កីឡាករ អេឌី រុស សុទ្ធតែប្រឈមនឹងគ្រោះថ្នាក់ទាំងអស់ ដូច្នេះ ជ័យជម្នះនេះមិនមែនកើតឡើងដោយការចៃដន្យ ឬកីឡាករបរតែសអន់នោះឡើយ ប៉ុន្តែជាសមត្ថភាពខ្លាំងរបស់កីឡាករកម្ពុជារូបនេះផ្ទាល់តែម្ដង។
ប៉ុន្តែយ៉ាងណា មហាជនមួយចំនួននៅតែយល់ថា កីឡាករ ធឿន ធារ៉ា ខ្លាំងបានតែនៅក្នុងរូងមិនហ៊ាមចេញប្រឡូកសង្វៀនក្រៅស្រុកល្បីៗ ដូចកីឡាករគុនខ្មែរមួយចំនួនឡើយ បើទោះបីលោកគ្រូធំ អេ ភូថង ចេញមុខពន្យល់ពីមូលហេតុចម្បងមួយចំនួនដែលបង្អាក់ការចេញប្រកួតក្រៅស្រុកហើយក៏ដោយ ដូច្នេះ សង្ឃឹមថា ថ្ងៃណាមួយ កីឡាករ ធឿន ធារ៉ា នឹងលាងជម្រះមន្ទិលសង្ស័យរបស់មហាជនមួយចំនួនតូចនេះ តាមរយៈការបង្ហាញមុខនៅសង្វៀនប្រទេសចិន ឬជប៉ុន នាពេលខាងមុខបានមិនខាន…៕