បន្ទាប់ពីបរាជ័យក្រោមកណ្តាប់ដៃក្របីព្រៃ និងចិញ្ចឹមចិត្តរង់ចាំការសងសឹងអស់ពេលជាយូរ ប៉ុន្តែមិនបានសមដូចបំណង ពេលនេះជើងខ្លាំងជប៉ុន តៃម៉ូ ហ៊ីសៃ ទទួលបានកាដូស្អំបេះដូង ដោយម្ចាស់ជើងឯកខ្សែក្រវាត់ KSF នៅបារាំងថ្មីៗ ឈុត សេរីវាន់ថង ចូលខ្លួនមកជំនួសសងសឹក និងបានណាត់គ្នាប្រកួតនៅសង្វៀន knock out ប្រទេសជប៉ុន…។
បន្ទាប់ពីមើលឃើញភាពខ្លាំងរបស់គុនខ្មែរ ពេលនេះ សង្វៀនប្រដាល់ដ៏ធំប្រចាំប្រទេសជប៉ុន knock out បានរៀបចំឱ្យកីឡាករកម្ពុជា ឈុត សេរីវាន់ថង ជួបប្រកួតជាមួយ តៃម៉ូ ហ៊ីសៃ ម្ចាស់ខ្សែក្រវាត់ knock out Lightweight championនាថ្ងៃទី០៤សីហា ឆ្នាំ២០២៤ ខាងមុខឆាប់ៗនេះ។
កីឡាករជើងខ្លាំងជប៉ុន តៃម៉ូ ហ៊ីសៃ បានមកប្រកួតគុនខ្មែរនៅលើទឹកដីកម្ពុជាដំបូង កាលពីថ្ងៃទី២៥មេសា ដោយកាលនោះ កីឡាករជប៉ុនរូបនេះ ជួបប្រកួតជាមួយកីឡាករក្របីព្រៃ ពេជ្រ សម្បត្តិ ហើយជាលទ្ធផលបានចាញ់ពិន្ទុទាំងមិនអស់ចិត្ត។
គេនៅចាំបានថា ការប្រកួតរវាងក្របីព្រៃ ពេជ្រ សម្បត្តិ ជាមួយម្ចាស់ខ្សែក្រវាត់knock out ជប៉ុន កីឡាករ តៃម៉ូ ហ៊ីសៃ បញ្ចប់៣ទឹកពេញ ដោយមិនមានអ្នកសន្លប់ ឬបោះបង់ការប្រកួតឡើយ។
ការប្រកួតពិតជាកក្រើកខ្លាំងមិនធម្មតារវាងកីឡាករទាំងពីរដែលបានប្តូរកណ្តាប់ដៃ រន្ទះជើងទៅវិញទៅមក តែយ៉ាងណា កីឡាករក្របីព្រៃ ពេជ្រ សម្បត្តិ បានផ្ដល់ស្នាមបែកលើចិញ្ចើមខាងស្ដាំឱ្យកីឡាករ តៃម៉ូ ហ៊ីសៃ នៅទឹកទី២ ដើម្បីទុកជាអនុស្សាវរីយ៍ពេលត្រឡប់ទៅប្រទេសជប៉ុនវិញ។
យ៉ាងណា ជាលទ្ធផលក្រោយបញ្ចប់ការប្រកួត ចៅក្រមទាំង៥រូប សម្រេចផ្តល់ជ័យជម្នះជាឯកឆន្ទឱ្យទៅកីឡាករកម្ពុជា។ ភ្លាមៗអ្នកលេងក្បាច់គុនចម្រុះ និងឃីកបុកស៊ីងជប៉ុនរូបនេះ ហាក់មិនអស់ចិត្តនឹងការបរាជ័យរបស់ខ្លួននេះទេ រូបគេបានសម្រក់ទឹកភ្នែកនៅចំពោះទស្សនិកជនរាប់ម៉ឺននាក់ និងបានចិញ្ចឹមចិត្តចង់សងសឹក កីឡាករក្របីព្រៃ ពេជ្រ សម្បត្តិ រហូតមកដល់ថ្ងៃនេះ។
គួរជម្រាបថា កីឡាករដែលមានរហស្សនាមរាហ៊ូមាស ឈុត សេរីវាន់ថង ដែលធ្លាប់ប្រកួតស្មើជាមួយកីឡាករ ពេជ្រ សម្បត្តិ និងថ្មីៗនេះរូបគេទើបដណ្ដើមបានខ្សែក្រវាត់ KSF គុនខ្មែរស៊ុបភើហ្វៃត៍ ហើយជាប់ជាបេក្ខភាពតំណាងគុនខ្មែរតែម្នាក់គត់ បន្តដំណើរទៅទីក្រុងប៉ារីស ត្រៀមប្រកួតដណ្ដើមរថយន្តខ្លាញ់គោ១គ្រឿងពីក្រុមហ៊ុនឯកជនក្នុងស្រុក និងបន្តដំណើរទៅប្រទេសជប៉ុននៅដើមខែសីហា ដើម្បីផ្សព្វផ្សាយក្បាច់គុនខ្មែរនៅទីនោះ ជាមួយមិត្តរួមជាតិ១រូបទៀត គឺទាយាទស្ដេចប្រដាល់ត្រកូលអេ កីឡាករ អេ អាំម៉ារីនភូថង ដូច្នេះយើងរង់ចាំមើលថា តើ កីឡាករ តៃម៉ូ ហ៊ីសៃ អាចឆ្លងកាត់ជើងខ្លាំងកម្ពុជាដែលមានរហស្សនាមរាហ៊ូមាស ឈុត សេរីវាន់ថង បានដែរ ឬក៏យ៉ាងណា?…៕