កីឡាករ ព្រំ សំណាង តាមរយៈជ័យជម្នះជាប់ៗគ្នាជាច្រើនប្រកួត នាមួយរយៈចុងក្រោយនេះ រូបគេមានឱកាសបានឡើងដណ្តើមខ្សែក្រវាត់មាស X TREME CAMBODIA KUN KHMER នាថ្ងៃសៅរ៍ទី១០សីហា ឆ្នាំ២០២៤ខាងមុខនេះ ក្នុងនាមជាគូឯកប្រចាំព្រឹត្តិការណ៍។
ទន្ទឹមគ្នានេះ អ្នកគាំទ្របាននិងកំពុងភ័យបុកពោះ ព្រោះកីឡាករបរទេសធ្លាប់ផ្តល់ភាពឈឺចាប់ឱ្យ ព្រំ សំណាង ម្ដងរួចមកហើយ។ តើលើកនេះ ព្រំ សំណាង អាចទារសំណងទាំងដើមទាំងការពីកីឡាករ លូកាស់ ហ្គាប៊្រីអែល បានទេ ឬត្រូវបរាជ័យជាលើកទី២..?
ការប្រកួតដណ្ដើមខ្សែក្រវាត់មាសពីកម្មវិធីX TREME CAMBODIA KUN KHMER រវាងកីឡាករ ព្រំ សំណាង ជាមួយកីឡាករប្រេស៊ីល លូកាស់ ហ្គាប៊្រីអែល នៅថ្ងៃចុងសប្ដាហ៍នេះ គឺជាការជួបគ្នាលើកទី២ និងជាការជម្រះបញ្ជីចាស់។ គួររំឭកថា កាលពីជាង៣ខែមុន ព្រំ សំណាង និងកីឡាករ លូកាស់ ហ្គាប៊្រីអែល បានជួបគ្នាម្ដងរួចមកហើយនៅសង្វៀនគូបូតា កាលពីថ្ងៃទី២៦មេសា ឆ្នាំ២០២៤ ដោយពេលនោះលូកាស់ ហ្គាប៊្រីល បានបន្សល់ទុកអនុស្សាវរីយ៍ជូរចត់បំផុត ដោយវាយចូលពេញផ្ទៃមុខកីឡាករ ព្រំ សំណាង ដេកដួលស្ដូកស្ដឹងនៅលើក្ដារតាបពីរហូតលោកអាជ្ញាកណ្ដាលរាប់ដល់៨ និងស្ទើរតែបោះបង់ការប្រកួតទៅហើយ តែសំណាងល្អពេលដែលរាប់ស្នូរជួងបញ្ចប់ទឹកបានបន្លឺឮឡើង។
ឈានចូលដល់ទឹក២-ទឹក៣ កីឡាករ ព្រំ សំណាង ប្រមូលស្មារតីបានមកវិញ និងព្យាយាមដេញតាមវាយសម្រុកទៅលើ កីឡាករ លូកាស់ ហ្គាប៊្រីអែល វិញដែរ ប៉ុន្តែមិនមានឱកាសវាយឱ្យកីឡាករបរទេសនេះរាប់វិញ។ ជាលទ្ធផលក្រោមការសម្រេចកាត់ក្ដីពីចៅក្រមទាំង៥រូប បានផ្តល់ជ័យជម្នះទៅឱ្យកីឡាករ លូកាស់ ហ្គាប៊្រីអែលតែម្ដង។ មែនទែនទៅ ប្រសិនបើកីឡាករបរទេសម្នាក់នេះមិនបានវាយឱ្យ ព្រំ សំណាង រាប់នៅក្នុងទឹកទី១ទេ គឺប្រហែលជាមិនអាចយកឈ្នះលើកីឡាករកម្ពុជាបានឡើយ។
ម្យ៉ាង លូកាស់ ហ្គាប៊្រីអែល ជាកីឡាករវាយបែបអាយខ្យូ និងមានចិត្តសាស្ត្របន្លាស់ទីរហ័ស ធ្វើឱ្យដៃគូបាត់បង់ម្ចាស់ការមិនអាចគ្រប់គ្រងស្មារតីបាន ហើយវាយបកទៅដៃគូវិញភ្លាមៗ ខណៈ ព្រំ សំណាង មានទម្រង់ប្រកួតយឺត និងមួយៗដូចមាន់ចឹកស្រូវ។ ជាក់ស្ដែង សម្រាប់ជំនួបលើកទី១កន្លងមក លូកាស់ ហ្គាប្រ៊ីអែល បានប្រើបច្ចេកទេសដកថយវាយចេញកណ្តាប់ដៃ និងទាត់ប្រយោលតបតទៅព្រំ សំណាងវិញពេញ៣ទឹក បើទោះកីឡាករ ព្រំ សំណាង ព្យាយាមដេញតាមវាយវិញ តែហាក់មិនទទួលបានផលឡើយ។
ទោះយ៉ាងណា អ្នកគាំទ្ររបស់កីឡាករ ព្រំ សំណាង បាននិងកំពុងភ័យបុកពោះ ជាថ្មីម្ដងទៀត ព្រោះលើកនេះត្រូវឡើងប្រកួតដណ្ដើមខ្សែក្រវាត់ X TREME CAMBODIA KUN KHMER ដែលកីឡាករ ព្រំ សំណាង មិនអាចមើលស្រាលអ្នកប្រដាល់ប្រេស៊ីលម្នាក់នេះបានឡើយ ព្រោះការបន្លាស់ទី និងកណ្តាប់ដៃរបស់កីឡាករ លូកាស់ ហ្គាប្រ៊ីអែល ធ្ងន់មិនចាញ់ ព្រំ សំណាងឡើយ បើហ៊ានតែប្រហែស និងប្រមាថដៃគូ ព្រំសំណាង ច្បាស់ជាហេតុការណ៍លើកទី២ទៀតមិនខាន…៕