Reign of Kings ជាព្រឹត្តិការណ៍ប្រដាល់គុនខ្មែរដ៏ធំមួយប្រចាំខែមីនា ខណៈក្រុមហ៊ុនឯកជនក្នុងស្រុកមួយបានជះប្រាក់រង្វាន់១០០លានរៀលក្នុងមួយកម្មវិធី លើខ្សែក្រវាត់ទាំង៥ខ្សែរបស់ខ្លួន ដាក់ឱ្យអ្នកលេងគុនខ្មែរចម្រុះជាតិសាសាន៍ប្រកួតដណ្តើមយកនាថ្ងៃទី៣០-៣១ ខែមីនា ឆ្នាំ២០២៤ ខាងមុខ នៅសង្វៀនគ្រុឌគុនខ្មែរដែលរៀបចំដោយស្ថានីយទូរទស្សន៍ជាតិកម្ពុជា(ទទក)…។
កម្មវិធីប្រដាល់គ្រុឌគុនខ្មែរ Reign of Kings ដ៏អស្ចារ្យនេះ ក៏មានដាក់បញ្ចូលនូវការសម្តែងសិល្បៈបុរាណ ការប្រគំតន្រ្តី ចូលរួមដោយតារាចម្រៀងយុវវ័យមួយចំនួន និងផ្ទាំងទស្សនីយភាពបង្ហោះដ្រូន (Drone Show) ជាង៥០០គ្រឿងពីលើអាកាស បង្ហាញរូបរាងខ្សែក្រវាត់ស្ដេចគ្រុឌ ដែលមិនធ្លាប់មានពីមុននៅកម្ពុជាផងដែរ។
សម្រាប់ព្រឹត្តិការណ៍ Reign of Kings នាថ្ងៃសៅរ៍ទី៣០មីនា ឆ្នាំ២០២៤ រួមមាន៖ កីឡាករដែលទទួលបានរហស្សនាមពីអ្នកប្រម៉ូដជាអធិរាជអំបោះឆៅ ធន់ រិទ្ធី ត្រូវប្រកួតគូឯកជាមួយកីឡាករមកពីអ៊ីរ៉ង់ អាលី យូសេហ្វ ក្នុងប្រភេទទម្ងន់៧៣គីឡូក្រាម ដណ្តើមខ្សែក្រវាត់ស្តេចគ្រុឌអមជាមួយប្រាក់រង្វាន់២០លានរៀល។
និងអ្នកលេងប្រអប់ឆ្វេងគុនខ្មែរ ឡៅ ចិត្រា ជួបជើងខ្លាំងថៃ ជូចារើន ដណ្តើមខ្សែក្រវាត់ស្តេចគ្រុឌក្នុងប្រភេទទម្ងន់៦៥គីឡូក្រាម អមជាមួយប្រាក់រង្វាន់២០លានរៀលដូចគ្នា។ ចំណែកនៅថ្ងៃអាទិត្យទី៣១មីនាវិញ កីឡាករដែលមានរហស្សនាមគ្រូមៅចាប់ខ្មោច លន បញ្ញា ត្រូវជួបមិត្តរួមជាតិ ជូចារើន មកពីប្រទេសថៃដែរ គឺកីឡាករ ភេតដាំ ផេតយិនឌី ក្នុងប្រភេទទម្ងន់ ៦៥ គីឡូក្រាម ខណៈកីឡាករដែលមានរហស្សនាមនាគខ្មៅ ឃឹម ឌីម៉ា ក៏នឹងជួបអ្នកលេងឆ្លងដែនមកពីថៃ ថងណយ វ៉សាងប្រ៉ះផៃ ដណ្តើមខ្សែក្រវាត់ស្តេចគ្រុឌគុនខ្មែរដូចគ្នាជាមួយកីឡាករ លន បញ្ញាដែរ។
ទោះយ៉ាងណា ការប្រកួតដណ្ដើមខ្សែក្រវាត់ស្ដេចគ្រុឌដែលមានដល់ទៅ៥គ្រឿង អមដោយទឹកប្រាក់១០០លានរៀលនេះ គឺជាឱកាសដ៏ល្អមួយសម្រាប់កីឡាករជួរមុខកម្ពុជា ដណ្ដើមយក និងបង្ហាញក្បាច់គុនទៅកាន់ឆាកអន្តរជាតិកាន់តែទូលំទូលាយតាមរយៈព្រឹត្តិការណ៍ធំប្រចាំខែរបស់ស្ថានីយទូរទស្សន៍ជាតិកម្ពុជា។
គួរជម្រាបថា កម្មវិធីសន្និសីទកាសែតនៃព្រឹត្តិការណ៍ Reign of Kings នឹងធ្វើឡើងនៅ Vattanac Golf Resort នាសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ នៅថ្ងៃទី២៩មីនានេះ ចាប់ពីម៉ោង៣រសៀលតទៅ…៕អានពត៌មានប្រចាំថ្ងៃ