លិប Valencia បានរងនូវការដាក់ទណ្ឌកម្ម ក្រោយពីផ្នែកខ្លះនៃកីឡដ្ឋានរបស់ខ្លួន ត្រូវបានហាមមិនឲ្យអ្នកគាំទ្រចូលទស្សនាចំនួន៥ប្រកួត បន្ទាប់ពីហេតុការណ៍រើសអើងជាតិសាសន៍លើខ្សែប្រយុទ្ធ Vinicius Jr របស់ក្លិប Real Madrid។
ប៉ូលិសអេស្ប៉ាញ បានឃាត់ខ្លួនមនុស្ស៣នាក់ទាក់ទងនឹងការប្រើប្រាស់ពាក្យសម្តីរើសអើងជាតិសាសន៍ទៅលើតារាឆ្នើមអន្តរជាតិប្រេស៊ីលរូបនេះ នៅកីឡដ្ឋាន Mestalla កាលពីថ្ងៃអាទិត្យ ទី២១ ខែឧសភា កន្លងទៅ។ ក្លិប Valencia ក៏បានរងពិន័យជាទឹកប្រាក់ចំនួន៤៥០០០អឺរ៉ូ (ស្មើនឹង៤,៨៥ម៉ឺនដុល្លារអាមេរិក) ផងដែរ។
កៅអីអង្គុយផ្នែកខាងត្បូងនៃកីឡដ្ឋានរបស់ក្លិប Valencia នឹងត្រូវបិតចំនួន៥ប្រកួត ហើយក្លិបនេះ មានរយៈពេល១០ថ្ងៃ ដើម្បីធ្វើការប្តឹងឧទ្ធរណ៍។ សហព័ន្ធកីឡាបាល់ទាត់អេស្ប៉ាញ ហៅកាត់ថា RFEF ក៏បានបញ្ជាក់ផងដែរថា Vinicius វ័យ២២ឆ្នាំ នឹងមិនជាប់ពិន័យព្យួរឡើយ ក្រោយពីបានរងពិន័យកាតក្រហម នៅនាទី ទី៩៧ ក្នុងពេលក្រុមខ្លួនចាញ់ក្នុងលទ្ធផល ១-០។
សហព័ន្ធកីឡាបាល់ទាត់អេស្ប៉ាញ បានបញ្ជាក់ក្នុងសេចក្តីថ្លែងការណ៍មួយថា ការសម្រេចចិត្តក្នុងការផ្តល់កាតក្រហមដល់ Vinicius គឺដោយសារតែរូបលោកស្ថិតក្រោមការគាបសង្កត់ ក្នុងចំណុចកាត់សេចក្តី ហើយបានបន្ថែមទៀតថា អាជ្ញាកណ្តាលរូបនេះ មិនអាចធ្វើការកាត់សេចក្តីឲ្យបានច្បាស់ពីអ្វីដែលបានកើតឡើងឡើយ៕អានពត៌មានប្រចាំថ្ងៃ