ក្រោយទទួលរងនូវការរះគន់យ៉ាងចាស់ដៃពីសំណាក់អ្នកគាំទ្រលើបណ្តាញសង្គម និងត្រូវបានប្រូម៉ូទ័រផ្អាកហៅឡើងសង្វៀន កីឡាករដែលមានរហស្សនាមរាហ៊ូមាស ឈុត សេរីវ៉ាន់ថង បានស្នើសុំឱ្យបញ្ឈប់ការហៅរូបគេជាកីឡាករIQ តទៅទៀត ស្របពេលដែលមហាជនមើលឃើញពីទម្រង់ប្រកួតថ្មី ខុសពីពេលមុនផងដែរ…។
កីឡាករ ឈុត សេរីវ៉ាន់ថង បានចេញមុខបកស្រាយ និងពន្យល់អំពីបច្ចេកទេសដែលខ្លួនបានវាយទៅលើដៃគូ ថាមានកីឡាករតិចណាស់ដែលអាចធ្វើបានដូចរូបគេ ព្រោះរូបគេអាចវាយបានទាំងទម្រង់បុក និងទម្រង់គេចថយចាំត្រងវាយបកពេលដៃគូវាយបុកខ្លាំងមកលើខ្លួន ពិសេសគឺការប្រកួតជាមួយកីឡាករ អេលីត សាន់ ជាឧទាហរណ៍ស្រាប់។
ប៉ុន្តែការចេញមុខបំភ្លឺរបស់កីឡាករ ឈុត សេរីវាន់ថង ពេលនោះ ប្រៀបបាននឹងជះអង្កាមបញ្ច្រាសខ្យល់ ពោលគឺអ្នកគាំទ្រកាន់តែរិះគន់ទ្វេដង ចំណែកឯប្រូម៉ូទ័រផ្គូផ្គងកីឡាតាមបណ្តាសង្វៀននានា ក៏ផ្អាកសកម្មភាពហៅកីឡាករ ឈុត សេរីវាន់ថង ឡើងប្រកួតផងដែរ។
យ៉ាងណា មហាជនសង្ឃឹមថា សម្រាប់ការឡើងសង្វៀនជាថ្មីរបស់កីឡាករ ឈុត សេរីវាន់ថង នាពេលនេះ រូបគេនឹងបង្ហាញស្នៀតប្រយុទ្ធ ចលនាប្រកួតឱ្យរស់រវើកនៃសិល្បៈក្បាច់គុនខ្មែរ ឱ្យនាក់គាំទ្រពេញចិត្ត ក៏ដូចជាការរួមចំណែកជួយផ្សព្វផ្សាយគុនខ្មែរទៅកាន់ឆាកអន្តរជាតិឱ្យល្បីរន្ទឺ តាមរយៈក្បាច់គុនដូនតាមួយនេះ កុំធ្វើដូចកីឡាករថៃ ឡើងមកប្រកួតនៅលើសង្វៀនគិតតែពីរាំ និងរត់គេចនោះ គឺមិនសក្តិសមជាកីឡាករប្រដាល់នោះទេ។អានពត៌មានប្រចាំថ្ងៃ