កីឡាករប៊ុលហ្គារី Stoyan Koprivlenski បានធ្វើឲ្យអ្នកគាំទ្រស្ទើរទូទាំងពិភពលោកមានការភ្ញាក់ផ្អើលនៅពេលរូបគេបានបញ្ចប់កំណត់ត្រាមិនចាញ់ជាង៥ឆ្នាំចុងក្រោយរបស់អ្នកប្រដាល់ថៃ Buakaw Banchamek និងបន្តឈ្នះ២ប្រកួតទៀតដើម្បីគ្រងជើងឯកឃីកបុកស៊ីងពិភពលោក K-1 World MAX 2024 ទម្ងន់៧០គីឡូក្រាម។
ការប្រកួតធ្វើឡើងនៅល្ងាចថ្ងៃអាទិត្យ ទី៧ ខែកក្កដា ឆ្នាំ២០២៤ នៅទីក្រុងតូក្យូ ប្រទេសជប៉ុន Stoyan បានយកឈ្នះពិន្ទុ Buakaw នៅជុំទី១ បន្ទាប់ពីតស៊ូគ្នា៣ទឹក ដោយរូបគេបានវាយឲ្យអាជ្ញាកណ្តាលរាប់៨ម្តង ខណៈកីឡាករថៃវាយខុសបច្ចេកទេសថែមទៀត។
Ryan Garcia បានចេញសារសុំទោស បន្ទាប់ពីបញ្ចេញមតិប្រកាន់ជាតិសាសន៍
នៅវគ្គពាក់កណ្តាលផ្តាច់ព្រ័ត្រ Stoyan បន្តឈ្នះពិន្ទុកីឡាករប្រេស៊ីល Dengue Silva តាមរយៈការតស៊ូគ្នា៣ទឹក ប៉ុន្តែរូបគេរឹតតែធ្វើឲ្យមានការភ្ញាក់ផ្អើលដោយបានផ្តួលកីឡាកររុស្ស៊ី Viktor Akimov ឲ្យសន្លប់ក្នុងទឹកទី១ ដើម្បីក្លាយជាម្ចាស់ខ្សែក្រវាត់ឃីកបុកស៊ីងពិភពលោកទម្ងន់៧០គីឡូក្រាម។
នេះជាលើកទី១ដែល Stoyan Koprivlenski បានឈ្នះខ្សែក្រវាត់នៅសង្វៀន K-1 ប៉ុន្តែបើក្រឡេកមកប្រវត្តិកន្លងមកក៏មិនធម្មតាដែរ រូបគេបានឈ្នះខ្សែក្រវាត់ឃីកបុកស៊ីងទម្ងន់៧០គីឡូក្រាមនៅសង្វៀនលំដាប់ពិភពលោក Glory របស់អាមេរិកកាលពីឆ្នាំ២០១៧។
Stoyan បានចាប់ផ្តើមអាជីពប្រដាល់ឃីកបុកស៊ីងតាំងពីឆ្នាំ២០១៣ដែលមានរយៈពេលជាង១១ឆ្នាំហើយ ប៉ុន្តែរូបគេក៏ធ្លាប់ជាកីឡាករស្ម័គ្រចិត្តជាច្រើនឆ្នាំផងដែរ។ ស្ថិតក្នុងវ័យ៣០ឆ្នាំ រូបគេមានប្រវត្តិប្រកួតអាជីព៣០ដង ក្នុងនោះឈ្នះ២២ដង និងចាញ់៨ដង។