កែវ រំចង់ សង្ឃឹម​ថា កាន់ ម៉េងហុង នឹង​អាច​ឈ្នះ​ខ្សែ​ក្រវាត់​ K-1 ទោះ​ត្រូវ​ប៉ះ​ជើង​ខ្លាំង​ជួរមុខ​របស់​ម្ចាស់​ផ្ទះ​ជប៉ុន

កីឡាករ​ធ្លាប់​មាន​ឈ្មោះ​បោះ​សម្លេងនិង​មាន​ប្រជាប្រិយ​ខ្លាំង​ជាង​​គេ​​ប្រចាំ​នៅ​​កម្ពុជា កែវ រំចង់ បានដាក់​ក្តី​សង្ឃឹម​ខ្ពស់​ទៅ​លើ​ កាន់ ម៉េងហុង ថា នឹង​អាច​ដណ្តើម​បាន​ជ័យ​ជម្នះ​ជូន​ជាតិ សម្រាប់​ការ​ចេញ​ទៅ​ប្រកួត​ដណ្តើម​ខ្សែ​ក្រវាត់​អន្តរជាតិ K-1 WORLD MAX 2024 នៅប្រទេស​ជប៉ុន បើទោះ​បី​ជា ​ម៉េងហុង ត្រូវ​ប៉ះ​ជើង​ខ្លាំង​លំដាប់ជួរ​​មុខ​​របស់​ម្ចាស់​ផ្ទះ ក្នុង​ការ​ប្រកួត​ជុំ​ទី​១ នា​ថ្ងៃទី​៧ ខែកក្កដា ខាង​មុខ​នេះ​ក៏​ដោយ។

ជា​កីឡាករ​កម្ពុជា​ម្នាក់ ដែល​ធ្លាប់​បាន​ទៅ​ចូលរួម​ការ​ប្រកួត​ព្រឹត្តិការណ៍​លំដាប់​ពិភព​លោក K-1 នៅ​ទី​ក្រុងតូក្យូ ប្រទេស​ជប៉ុន កាល​ពី​ឆ្នាំ​២០២០ ហើយ​ក៏​បាន​យក​ឈ្នះ​កីឡាករ​ម្ចាស់​ផ្ទះ​របស់ជប៉ុន​ផង​នោះ កែវ រំចង់ បាន​ឱ្យ​ដឹង​ថា ច្បាប់​ប្រកួត​នៅ K-1 គេ​ប្រកួត​៣ទឹក មិន​ឱ្យ​ចាប់​ឱប​ឡាំជង្គង់​ទេ តែ​អាច​បោះ​ជង្គង់​ជា​ប្រយោល​បាន ហើយ​ក៏​មិន​អនុញ្ញាត​ឱ្យ​ប្រើ​កែង​នោះដែរ។

ចំពោះ​ច្បាប់​ប្រកួត​តាម​លំនាំ​​ប្រដាល់​ឃីកបុកស៊ីង (Kickboxing) ​នេះ កែវ រំចង់ មើល​ឃើញ​ថា វាមាន​ភាព​អំណោយ​ផល​ សម្រាប់​កីឡាករ កាន់ ម៉េងហុង ដែល​មានជំនាញ​​ប្រកួតបែប​នេះ និងមាន​ភាពរហ័សរហួន ហើយ ម៉េងហុង ក៏​ធ្លាប់ដណ្តើម​បានមេដាយ​ប្រាក់ សម្រាប់ការ​ប្រកួត​លើ​វិញ្ញាសាឃីក​បុកស៊ីង ក្នុង​ព្រឹត្តិការណ៍​ស៊ីហ្គេម លើក​ទី​៣១ ឆ្នាំ​២០២២ នៅប្រទេស​វៀតណាម​ផងដែរ។

ម៉ារីអូ អាល់វ៉ារ៉េស ក្រោយផ្ដួលឈុត សេរីវ៉ាន់ថងនៅបារាំង នឹងលេចមុខជាថ្មីក្នុងការប្រកួតដណ្ដើមខ្សែក្រវាត់ពិភពគុនខ្មែរនៅអេស្បាញ

កែវ រំចង់ ដែលជា​គ្រូជំនួយ​ម្នាក់​របស់ កាន់ ម៉េងហុង ផង​នោះ បានបញ្ជាក់ថា៖ «ខ្ញុំ​សង្ឃឹមទៅ​​លើ កាន់ ម៉េងហុង ព្រោះ​គាត់​ហ្វឹក​ហាត់​ខ្លាំង ហើយគាត់មានភាពរហ័សរហួន​ដូច​ស្វាអ៊ីចឹង គឺ​គាត់​​វាយចេញចូលបាន​​លឿន​មែន​ទែន ហេតុនេះខ្ញុំ​​សង្ឃឹម​លើ​គាត់ ក្នុង​ការដណ្តើម​បានជ័យជម្នះ​យក​មកជូនជាតិ​មាតុភូមិ​»។

ការ​​បង្ហាញ​ភាពជឿជាក់​ទៅលើ កាន់ ម៉េងហុង នេះ គឺ កែវ រំចង់ បាន​លើក​ឡើង ក្នុងពេលរូប​គេ​បាន​ចូលរួម​ជូនដំណើរ​ កាន់ ម៉េងហុង នៅ​ព្រលាន​យន្ត​ហោះអន្តរជាតិ​ភ្នំពេញ កាលពី​ថ្ងៃទី​៤ ខែកក្កដា ហើយ​ពេល​នេះ ម៉េងហុង និង​ប្រតិភូ​ដឹកនាំ បាន​ធ្វើដំណើរ​ដល់​ទី​ក្រុង​តូក្យូ ប្រទេសជប៉ុន​ហើយ ដើម្បី​ត្រៀម​ការ​ប្រកួតម៉ារ៉ាតុង​​ដណ្តើម​ខ្សែ​ក្រវាត់ពិភព​លោក ក្នុង​ព្រឹត្តិការណ៍ K-1 WORLD MAX 2024 នេះ។

សម្រាប់​ការ​ប្រកួតម៉ារ៉ាតុង​ដណ្តើមខ្សែ​ក្រវាត់​ World Championship Tournament ប្រភេទ​ទម្ងន់​៥៥​គីឡូក្រាម​នេះ មាន​បេក្ខភាពចំនួន​៨នាក់ ​ក្នុង​នោះ​មាន​កីឡាករ​ម្ចាស់​ផ្ទះជប៉ុន​Akihiro Kaneko, Masahi Kumura, Riamu និង Rui Okubo រួមទាំង​កីឡាករ​កម្ពុជា កាន់ ម៉េងហុង អ្នក​ប្រដាល់​អេស្ប៉ាញ Antonio Orden កីឡាករក្រិក Angelos Martinos និង​កីឡាករចិន Zhao Zhendong។