ក្រោយដណ្តើមបានមេដាយមាស ប្រាក់ និងសំរឹទ្ធ កីឡាការិនីកម្ពុជា២រូប គឺកញ្ញា ខាន់ ចេសា និងអ្នកនាងស្រួង ភាវី បានសម្រេចចិត្តបរិច្ចាគថវិកាលើកទឹកចិត្តពីប្រមុខរាជរដ្ឋាភិបាលកម្ពុជា ផ្ដល់ជូនទៅស្ថាប័នបម្រើឱ្យកិច្ចការងារសង្គម ដោយកញ្ញា ខាន់ ចេសា បានបរិច្ចាគថវិកាចំនួន៧០លានរៀលដល់កាកបាទក្រហមកម្ពុជា និងអ្នកនាង ស្រួង ភាវី នឹងបរិច្ចាគថវិកាចំនួន៥៦លានរៀលដល់មូលនិធិសប្បុរសធម៌…។
នកនាង ស្រួង ភាវី បានបង្ហោះសារនៅគណនីផ្ទាល់ខ្លួនរបស់អ្នកនាងថា «រាល់ថវិកាដែលខ្ញុំប្រកួតបានជ័យជម្នះ បានទាំងប៉ុន្មានក្នុងការប្រកួតឈ្នះ ឬចាញ់ ទោះតិចក្ដី ច្រើនក្ដី គឺខ្ញុំប្រមូលដាក់ទៅក្នុងមូលនិធិសប្បុរសធម៌ទាំងអស់។
ហើយតាមពិតទៅ ខ្ញុំមិនមែនជាមានទ្រព្យធនច្រើនអីទេ តែខ្ញុំធ្វើនេះ គឺព្រោះចង់បង្ហាញឱ្យឃើញថា រាល់សកម្មភាពពីមុន និងឥឡូវ ហើយទៅអនាគត គឺនៅដដែល ក្នុងការជួយដល់ប្អូនៗនៅក្នុងប្រទេសខ្មែរដែលត្រូវការជំនួយជាចាំបាច់ក្នុងការស្វែងរកការរៀនសូត្រក្រេបយកចំណេះដឹងទៅអនាគត ខ្ញុំផ្ទាល់ទាំងបេះដូង និងអាយុជីវិត គឺខ្ញុំលះបង់ដើម្បីកម្ពុជាអរគុណពុកម៉ែបងប្អូនណាស់។»
សូមបញ្ជាក់ថា កីឡាការិនី ស្រួង ភាវី បានចូលរួមប្រកួតលើវិញ្ញាសាចំនួន២ គឺវិញ្ញាសាការ៉ុម៣បាំងឈ្នះមេដាយមាស និងវិញ្ញាសាការ៉ុម១បាំង ឈ្នះមេដាយសំរឹទ្ធ ពីព្រឹត្តិការណ៍ប្រកួតកីឡាអាស៊ីអាគ្នេយ៍ លើកទី៣២ នៅប្រទេសកម្ពុជា ខណៈដែលកីឡាការិនីរូបនេះ ស្ថិតក្នុងចំណាត់ថ្នាក់លេខ២ពិភពលោក លើកីឡាប៊ីយ៉ែ និងស្នូឃ័រ ប្រភេទការ៉ុមនេះផងដែរ។
ដោយឡែក កីឡាការិនី ខាន់ ចេសា ដែលដណ្តើមបានមេដាយមាស១គ្រឿង និងប្រាក់១គ្រឿងដែរនោះ ក៏បានប្រកាសបរិច្ចាគថវិកាដែលនាងនឹងទទួលបានពីប្រមុខរាជរដ្ឋាភិបាលកម្ពុជា ចំនួន៧០លានរៀលនោះ ដល់កាកបាទក្រហមកម្ពុជាផងដែរ។
កីឡាការិនី ខាន់ ចេសា បញ្ជាក់ថា ដោយមើលឃើញពីទុកលំបាករបស់ប្រជាពលរដ្ឋខ្មែរមួយចំនួន ដូចនេះ នាងចង់ជួយចែករំលែកក្ដីស្រឡាញ់ សម្រាលដល់ទុក្ខលំបាកនានាតាមរយៈការបរិច្ចាគថវិកាទាំងនេះ ទៅដល់កាកបាទក្រហមកម្ពុជា ដែលជាស្ថាប័នជាតិមួយ បម្រើកិច្ចការមនុស្សធម៌ ដោយគ្មានការរើសអើង និន្នាការនយោបាយ ឬប្រកាន់ពូជសាសន៍ ពណ៌សម្បុរនោះឡើយ។
គូសបញ្ជាក់ផងដែរថា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍ លើកទី៣២ នៅប្រទេសកម្ពុជានេះ រាជរដ្ឋាភិបាលកម្ពុជា បានប្រកាសផ្តល់ប្រាក់រង្វាន់លើកទឹកចិត្តដក់ក្រុមអត្តពលិកកម្ពុជា ដែលដណ្តើមបានមេដាយជូនជាតិ ដោយក្នុងនោះ សម្រាប់អ្នកដែលដណ្តើមបានមេដាយមាស នឹងទទួលបានប្រាក់រង្វាន់លើកទឹកចិត្តចំនួន៤០លានរៀល, មេដាយប្រាក់ នឹងទទួលបានប្រាក់រង្វាន់លើកទឹកចិត្តចំនួន៣០លានរៀល និងមេដាយសំរឹទ្ធ នឹងទទួលបានប្រាក់រង្វាន់លើកទឹកចិត្តចំនួន១៦លានរៀល…៕អានពត៌មានប្រចាំថ្ងៃ