ការប្រកួតប្រដាល់គុនខ្មែរក្នុងកម្មវិធីអ្នកប្រមាញ់គុនខ្មែរលើក្រុមអ្នកពិឃាតបរទេសទាំង៥នាក់របស់ស្ថានីយទូរទស្សន៍ថោន នៅររសៀលថ្ងៃអាទិត្យទី១០ ខែកញ្ញា ឆ្នាំ២០២៣នេះ កីឡាករបេឡារុស នីគីតា ជីរ៉ាសីម៉ូវីស អាចស៊ូនឹងកណ្តាប់ដៃកីឡាករ ធឿន ធារ៉ា បានត្រឹមពាក់កណ្តាលទឹកទី២ប៉ុណ្ណោះ ខណៈកីឡាករ នីគីតា ជីរ៉ាសីម៉ូវីស ហាក់មិនពេញចិត្តនឹងសម្រេចចិត្តរបស់លោកអាជ្ញាកណ្ដាលកាត់សេចក្តីឡើយ…។
គ្រាន់តែស្នូរជួងបន្លឺសំឡេងផ្តើមនៃការប្រកួត កីឡាករ ធឿន ធារ៉ា បានសម្រុកវាយសន្ធាប់ទៅលើកីឡាករ នីគីតា ជីរ៉ាសីម៉ូវីស តែម្ដង ប៉ុន្តែកីឡាករសញ្ជាតិបេឡារុសរូបនេះ ហាក់ដឹងពីស្នៀតប្រយុទ្ធរបស់កីឡាករ ធឿន ធារ៉ា ធ្វើឱ្យរូបគេគេចផុតជាញឹកញាប់ និងទប់ទល់រហូតដល់បញ្ចប់ទឹកទី១ទាំងលំបាក។
យ៉ាងណា ចូលមកដល់ទឹកទី២ កីឡាករ ធឿន ធារ៉ា បង្កើនការប្រយុទ្ធ និងវាយសន្ធាប់ទៅលើកីឡាករ នីគីតា ជីរ៉ាសីម៉ូវីស ស្ទើរដកដង្ហើមមិនដល់គ្នា។ លុះដល់ពាក់កណ្តាលនៃទឹកទី២ កីឡាករ នីគីតា ជីរ៉ាសីម៉ូវីស ហក់ចូលមកត្រូវជំហររបស់ធឿន ធារ៉ា ចាំត្រងក៏ត្រូវចំមួយដៃពេញគល់ថ្គាមបណ្តាលឱ្យដួលដាច់ជំហរទៅលើក្តាតាបពី ត្រូវលោកអាជ្ញាកណ្ដាលរាប់ដល់៨ មិនទាន់ដឹងខ្លួន លោកម៉ាក់ សាមឿន បន្តរាប់ដល់១០តែម្ដង។
ស្មារតីមិនទាន់ដឹងស្រួលបួលផង ចុះបើលោកអាជ្ញាកណ្ដាលបណ្តោយឱ្យប្រកួតបន្ត ហើយកីឡាករមានគ្រោះថ្នាក់ជាយថាហេតុ តើនរណាជាអ្នកទទួលខុសត្រូវ..? ការណ៍នេះ បើកីឡាករ នីគីតា ជីរ៉ាសីម៉ូវីស មិនអស់ចិត្ត អ្នករៀបចំកម្មវិធីអាចនឹងរៀបចំឱ្យកីឡាករទាំងពីរ ជួបគ្នាជាថ្មីម្ដងទៀត ដើម្បីឱ្យកីឡាករបរទេសរូបនោះចាញ់ឱ្យអស់ចិត្ត..៕អានពត៌មានប្រចាំថ្ងៃ