កម្ពុជា​ហក់​ចូល​ក្រុម​ប្រទេស​ឈ្នះ​មេដាយមាស​​លើស​​ ១០០​ គ្រឿង​ពី​ស៊ី​ហ្គេ​ម​គ្រប់​សម័យកាល

ម្ចាស់ផ្ទះ​កម្ពុជា​កំពុង​បន្តដំណើរ​បើក​ទំព័រ​ប្រវត្តិសាស្ត្រ​របស់​ខ្លួន នៅ​ក្នុង​ព្រឹត្តិការណ៍​កីឡា​ស៊ី​ហ្គេ​ម​លើក​ទី​៣២ ឆ្នាំ​២០២៣ គិត​ត្រឹម​វេលា​ម៉ោង ០៩:០០​នាទី​ព្រឹក​ថ្ងៃ​ទី​១២ ខែឧសភា​នេះ ម្ចាស់ផ្ទះ​កម្ពុជា​រកបាន​មេដាយ​សរុប ១៥៤​គ្រឿង មាស​៥៦ ប្រាក់​៤៤ និង​សំរឹទ្ធ​៥៤ ដោយ​បាន​បំបែក​កំណត់​ត្រា​មេដាយមាសខ្លួន​ឯង​ នៅ​កីឡា​ស៊ី​ហ្គេ​ម​ឆ្នាំ​១៩៧១ នៅ​ទីក្រុង​គូ​ឡា​ឡាំ​ពួរ ប្រទេស​ម៉ា​ឡេ​ស៊ី ដែល​ជា​ឆ្នាំ​ជោគជ័យ​របស់​កម្ពុជា ក្រោយ​ឈ្នះ​មេដាយ​សរុប​៥៣​គ្រឿង មាស​១៧ ប្រាក់​១៨ និង​សំរឹទ្ធ​១៨​។

ជាមួយនឹង​ជោគជ័យ​ថ្មី នៅ​ក្នុងឆ្នាំនេះ សម្រាប់​កីឡា​ស៊ី​ហ្គេ​ម​លើក​ទី​៣២ ដែល​កំពុង​ដំណើរការ​ប្រកួត កម្ពុជា​បាន​ក្លាយជា​ប្រទេស​ទី​៨ ឈ្នះ​មេដាយមាស​៣​ខ្ទង់ ឬ​លើស​១០០​គ្រឿង​នៃ​កីឡា​ស៊ី​ហ្គេ​ម​គ្រប់​សម័យកាល​។ នេះ​បើ​យោង​តាម​ទិន្នន័យ​ចេញ​ដោយ​ក្រុមប្រឹក្សា​អូ​ឡាំ​ពិ​ក​អាស៊ី ដែល​ហៅ​កាត់​ថា OCA​។

កម្ពុជា​បាន​ក្លាយជា​ប្រទេស​ទី​៨ ដែល​ឈ្នះ​មេដាយមាស​លើស​១០០​គ្រឿង​នៃ​កីឡា​ស៊ី​ហ្គេ​ម​គ្រប់​សម័យកាល ដោយ​គិត​ចាំ​តាំងពី​បង្ហាញ​វត្តមាន​លើក​ដំបូង​ក្នុង​ឆ្នាំ​១៩៦១ រហូត​ទល់​ពេល​បច្ចុប្បន្ន​នេះ កម្ពុជា​ឈ្នះ​មេដាយ​សរុប​ចំនួន ៥៤១​គ្រឿង មាស​១១៤ ប្រាក់​១២៨ និង​សំរឹទ្ធ​២៩៩​គ្រឿង​។
ប្រទេស​កំពូល​ទាំង​៣ ដែល​ឈ្នះ​មេដាយ​ច្រើន​ជាងគេ​បំផុត​ក្នុង​ប្រវត្តិសាស្ត្រ​ព្រឹត្តិការណ៍​កីឡា​ស៊ី​ហ្គេ​ម​គឺ​ប្រទេស​ថៃ ឈ្នះ​សរុប ៦៤៧២​គ្រឿង មាស​២៣៤៥ ប្រាក់​២០៣១ និង​សំរឹទ្ធ​២០៩៦​គ្រឿង​។

លេខ​២ គឺ​ឥណ្ឌូ​ណេ​ស៊ី ឈ្នះ​មេដាយ​សរុប ៥៥៥០​គ្រឿង មាស​១៨៩៣ ប្រាក់​១៧៩៦ និង​សំរឹទ្ធ​១៨៦១​គ្រឿង ខណៈ​ដែល​លេខ​៣ គឺ​ម៉ា​ឡេ​ស៊ី ឈ្នះ​មេដាយ​សរុប ៤៤៣៥​គ្រឿង មាស​១៣៤២ ប្រាក់​១៣១៨ និង​សំរឹទ្ធ​១៧៧៥​គ្រឿង​។ដោយឡែក​សម្រាប់​ប្រទេស ឡាវ ព្រុយ​ណេ និង​ទី​ម័​រ​ខាងកើត នៅ​មិន​ទាន់​រកបាន​មេដាយមាស​៣​ខ្ទង់ ឬ​១០០​គ្រឿង​នៅឡើយ​ទេ សម្រាប់​ការ​ប្រកួត​ព្រឹត្តិការណ៍​កីឡា​ថ្នាក់​តំបន់​ដ៏​ធំ​មួយ​នេះ​។

សូម​ជម្រាប​ជូន​ថា សម្រាប់​កីឡា​ស៊ី​ហ្គេ​ម​លើក​ទី​៣២ ឆ្នាំ​២០២៣ នៅ​កម្ពុជា ដោយ​គិត​ត្រឹម​វេលា​ម៉ោង​០៩:០០​នាទី​ព្រឹក​ថ្ងៃ​ទី​១២ ខែឧសភា​នេះ វៀតណាម​កំពុង​បន្ត​ឈរ​កំពូល​តារាង​បណ្តោះអាសន្ន​ចំនួន​មេដាយ ដោយ​ពួក​គេ​ឈ្នះ​មេដាយមាស​៥៨​គ្រឿង ប្រាក់​៥៧ សំរឹទ្ធ​៧២ សរុប​១៨៧​គ្រឿង​។ លេខ​២ កម្ពុជា ឈ្នះ​មេដាយមាស​៥៦​គ្រឿង ប្រាក់​៤៤ សំរឹទ្ធ​៥៤ សរុប​១៥៤​គ្រឿង និង​លេខ​២ ថៃ​ឈ្នះ​មេដាយមាស​៥៤​គ្រឿង ប្រាក់​៣៩ សំរឹទ្ធ​៥៨ សរុប​១៥១​គ្រឿង​៕អានពត៌មានប្រចាំថ្ងៃ